सेती प्रादेशिक अस्पताललाई तीन सय शैय्याको अस्पताल बनाउने प्रक्रिया सुरु

कैलाली - सुदूरपश्चिम प्रदेश सरकारले सेती प्रादेशिक अस्पताललाई तीन सय शैयाको बनाउन प्रकृया अघि बढाएको छ । प्रदेशको मन्त्रिपरिषदको आज बसेको बैठकले सेती प्रादेशिक अस्पताललाई तीन सय शैय्या बनाउन विस्तृत परियोजना अध्ययन(डीपीआर) प्रतिवेदन तयार गरी त्यसको अनुमानित लागत, डिजाइन र टेण्डरका लागि समेत गरी एक करोड रुपैया स्वीकृत गरेको छ ।

प्रदेश सरकारकी प्रवक्ता आन्तरिक मामिला तथा कानुन मन्त्री पूर्णा जोशीले सेती प्रादेशिक अस्पताललाई तीन सय शैयाको बनाउन प्रकृया थालिएको बताउदै मन्त्री परिषदको बैठकले सुदूर पश्चिम प्रदेश लोक सेवा आयोगको २०७७/७८ को वार्षिक प्रतिवेदन प्रदेश सभामा पेस गर्ने निर्णय समेत गरेको बताइन ।

---

त्यस्तै प्रदेश सभाको आठौ वर्षे अधिबेशन शुक्रबार राति १२ बजेबाट अन्त्य गर्ने बैठकले निर्णय गरेको छ । त्यसैगरी प्रदेश उच्च शिक्षाको संभाव्यता अध्ययनका लागि गठन भएको कार्यदललाई समेत बैठकले पूर्णता दिएको छ।

प्राविधिक शिक्षाविद डा. खेमराज जोशीको संयोजकत्वमा नौ सदस्यीय कार्यदलले आजको बैठकबाट पूर्णता पाएको छ । त्यसैगरी मन्त्रिपरिषद्को बैठकले सुदूरपश्चिमको डोटी,डडेल्धुरा र कञ्चनपुरमा प्रदेश लेखा इकाई कार्यालय गठन गर्ने र तीन वटै कार्यालयमा ५/५ जना कर्मचारीको दरबन्दी स्वीकृत गरेको छ ।