धनुषामा ३२ प्रतिशतले लगाए काेभिडविरुद्धको पूर्णखोप

जनकपुरधाम - धनुषामा असहलेसम्म ३२ प्रतिशत नागरिकले मात्रै काेभिडको पूर्णखोप लगाएका छन् । जिल्ला स्वास्थ्य कार्यालय धनुषाले सोमबार जारी गरेको तथ्यांकअनुसार जिल्लाका ३२ प्रतिशत नागरिकले पूर्ण र ३६ प्रतिशतले एक डोज लगाएका छन् । जिल्लाको कूल जनसंख्या ८ लाख ४७ हजार ८ सयमध्ये अहिलेसम्म खोपको पहिलो मात्रा १ लाख ७३ हजार ८४ र दोस्रो मात्रा १ लाख ३७ हजार ६४ जना गरी जम्मा ३ लाख १० हजार १ सय ४८ जनाले लगाएका छन् ।

जसमध्ये १८ वर्षभन्दामाथिको उमेर समूहका १ लाख ३७ हजार ६४ जना र १२ देखि १७ वर्ष उमेर समूहका १ हजार ७ सय व्यक्ति रहेको स्वास्थ्य कार्यालयले जनाएको छ। जिल्लामा १८ वर्षभन्दामाथिको उमेर समूहका ४ लाख १८ हजार ९२३ र १२ देखि १७ वर्ष उमेर समूहका ९४ हजार ४ सय ३२ जना अझै खोप लगाउन बाँकी रहेका छन् ।

---

जिल्लामा कोभिसिल्ड, भेरोसेल, जोनसन एण्ड जोनसन, एस्ट्राजेनेका र फाइजर गरि पाँच प्रकारका खोप लगाइएको छ। धनुषामा काेभिड विरुद्धको खोप लगाउन छुटेकालाई अगामी मंसिर २४ देखि २८ गतेसम्म लगाइने जिल्ला स्वास्थ्य कार्यालय धनुषाले जानकारी दिएको छ ।

धनुषाका खोप अधिकृत राजदेव यादवले काेभिडविरुद्धको भेरोसेल खोप १ लाख व्यक्तिलाई दिने कार्यक्रम रहेको बताए । जिल्लाका ६३१ वटा खोप केन्द्रहरु मार्फत् खोप लगाइने उनले बताए ।  एउटा खोप केन्द्रमा १ जना खोप लगाइदिने व्यक्ति र २ जना सहयोगी तथा जिल्लाका १ सय ६९ वटै वडामा त्यति नै संख्यामा खोप सुपरभाइजरसमेत परिचालन गरिएको उनले बताए । 

विगतमा १ डोज लगाएका व्यक्तिहरुले पनि दोस्रो डोज लगाउन सक्ने उनले बताए । स्वास्थ्य कार्यालय धनुषाका निमित्त कार्यालय प्रमुख युगल किशोर यादवले निर्धक्क भएर खोप लगाउन सर्वसाधारणमा आग्रह गरेका छन् । १८ वर्ष र सो भन्दा माथिका सबै नागरिकलाई  स्वास्थ्य कार्यालयमा नै  खोपको पहिलो र दोस्रो मात्रा मंसिर १६ देखि लगाउन थालिएको र २९ गतेसम्म लगाउन सकिने उनले जानकारी दिए ।