काठमाडौँ- सिसिएमसीको बैठकमा प्रधानमन्त्री शेरबहादुर देउवाले अहिलेसम्म भएको प्रगति विवरणको जानकारी माग गरेका छन् । शुक्रबार बसेको बैठकमा प्रधानमन्त्री देउवाले कोभिड-१९ नियन्त्रणमा भइ रहेको प्रगति विवरणको माग गरेको सिसिएसमीको प्रवक्ता सुनिता नेपालले जानकारी दिइन् ।

प्रधानमन्त्री देउवाले कोभिड संक्रमितको संख्या बढेकाले उपचार गर्न तयारी अवस्थामा राख्‍न निर्देशन दिएको नेपालले जानकारी दिइन् । आजको बैठकमा अक्सिजनको मात्रा बढाएर अस्पताललाई संक्रमितको उपचार गर्न तयारी अवस्थामा राख्‍न पनि उनले निर्देशन दिएका छन् ।

---

खोप लगाउने कार्यलाई तीव्रता दिनलाई पनि उनले जोड गरेको प्रवक्ता नेपालले बताइन् । आवश्यक व्यक्तिलाई अतिरिक्त खोप उपलब्ध गराउन पनि उनले माग गरेका थिए । ओमिक्रोनको संख्या बढेकाले सचेतनाको कार्यक्रम गर्न उनले दिएको उनले सुनाइन् ।

'निषेधाज्ञा र लकडाउन गर्ने विषयमा कुनै पनि छलफल भएन,' उनले भनिन्,' संक्रमणको दर बढी रहेको ठाउँमा जिल्ला प्रशासन र स्थानीय तहलाई निषेधाज्ञा गर्न निर्देशन दिइसकेको छ ।' कोभिडको नयाँ भेरियन्ट देखा पर्न थालेकाले जनस्वास्थ्यको मापदण्ड अपनाउन आग्रह गर्न सचेतना कार्यक्रम गर्नलाई उनले आग्रह गरेका थिए ।