बजेटअभावमा कोभिड-१९ विरुद्धको खोप अभियान नरोकिने

काठमाडौँ : स्वास्थ्य तथा जनसंख्या मन्त्रालयले बजेट अभावमा कोभिड-१९ विरुद्धको खोप अभियान प्रभावित हुन नदिने बताएको छ । राज्यमन्त्री नवराज राउतले सोमबार स्वास्थ्य पत्रकार मञ्‍च नेपालले आयोजना गरेको’ कोभिड-१९ को महामारी र कोभिसिल्ड खोपको प्रभावकारिता’ विषयक अन्तरक्रियामा बजेट अभाव हुन नदिन अर्थ मन्त्रालय र अन्य निकायसँग समन्वय गरिने बताए । 

उनले सरकारले निर्धारण गरेको प्राथमिकता र मापदण्डका आधारमा खोप लगाउन आग्रह गरे । कोभिसिल्ड खोपको गुण्स्तरियता, भण्डारण गर्दा अपनाइएको मापदण्ड, उत्पादन क्षमता र न्यून आय भएकाले पनि खरिद गर्न सक्ने मुल्यको आधारमा नेपालमा मान्यता दिइएको उनले बताए । त्यस्तै उनले कोरोना नियन्त्रणमा बर्तमान सरकारले उत्कृष्ठ काम गर्न सफल भएको दाबी गरे । 

---

कार्यक्रममा परिवार कल्याण महाशाखाको बाल स्वास्थ्य तथा खोप शाखा प्रमुख डा. झलक गौतमले कोभिसिल्ड खोप नेपाल सहित १६ वटा राष्ट्रमा प्रयोग भइरहेको भन्दै निर्धक्कका साथ लगाउन सबैलाई आग्रह गरे ।