कोभिड खोप लगाएका ७२ वर्षीय वृद्धमा संक्रमण पुष्टि

काठमाडौँ : कोभिड-१९ विरुद्धको खोप लगाएका काठमाडौँका एक वृद्धमा कोभिड संक्रमण पुष्टि भएको छ । ७२ वर्षीय उनले फागुन २३ गते खोप लगाएका थिए । सोमबार टेकु अस्पतालमा परीक्षण गर्दा उनमा संक्रमण पुष्टि भएको हो ।

अस्पतालका संक्रमण रोग विशेषज्ञ डा. अनुप बास्तोलाले उनले खोप लगाएको केही समयमै परिवारका सदस्यलाई कोभिड पोजेटिभ देखिएको बताए ।

---

‘खोप लगाउनुभन्दा अगाडि नै उहाँमा संक्रमण सरिसकेको रहेछ,’ उनले भने, ‘२७ गते छोरा र २९ गते श्रीमतीमा कोभिड पोजेटिभ देखिएको रहेछ । खोपले तत्कालै काम नगर्ने भएकाले उहाँलाई पनि संक्रमण पुष्टि भएको हो ।' 

डा. बास्तोलाका अनुसार उनमा निमाेनिया देखिएको छ । हाल उनको आईसीयूमा उपचार भइरहेको छ ।