श्रध्दा अब नयाँ जमानाकी ‘नागिन’

कठमाडौं : ‘आशिकी २’बाट डेब्यु गरेयता श्रद्धा कपुरले लोभलाग्दो काम गरेकी छैनन् । ‘हसिना पार्कर’मा अलि फरक काम गर्न खोजेकी थिइन् तर त्यो फिल्म कसैले हेर्ने चाखै दिएनन् ।

तर, यस्ता फ्लपले उनको व्यस्ततालाई खासै असर गरेको छैन । एकपछि अर्को फिल्म साइन गरिरहेकी छिन् । लकडाउनकै बीचमा उनले रनवीर कपुरसँग खेल्ने गरी लभ रञ्जनले निर्देशन गर्ने फिल्म साइन गरेको खबर थियो ।

---

लगत्तै श्रद्धालाई लिएर निर्माता निखिल द्धिवेदीले ‘नागिन’ बनाउने घोषणा गरेका छन् । तर, यो फिल्म एक भाग हैन तीन भागमा बन्ने छ । श्रद्धाले फिल्ममा ‘नागिन’ बन्न तयार रहेको पुष्टि गर्दै फिल्मलाई लिएर आफू उत्साहित रहेको प्रतिक्रिया दिएकी छिन् ।

‘ म श्रीदेवीलाई नागिनको रुपमा हेर्दै, हुर्कंदै आएकी हुँ र मनको कुनामा मैले पनि यो भूमिका गर्न पाए हुन्थ्यो भन्ने थियो । अन्ततः त्यो अवसर आएको छ,’श्रद्धाले इन्डिन एक्सप्रेसलाई प्रतिक्रिया दिँदै भनेकी छिन् ।

‘नागिन’को रुपमा सबैभन्दा स्मरणीय भूमिका गर्नमा श्रीदेवीको नाम सबैभन्दा अघि आउँछ । उनले ‘नागिन’ र ‘निगाहें’मा नागिनको रुपमा काम गरेकी थिइन् । त्योबाहेक, रिना राय, मनिषा कोइराला, मौनी राय आदिले पनि नागिनको भूमिका निर्वाह गरेका छन् ।

निर्माण टिमले नयाँ नागिन आधुनिक हुने र प्रेमकथामा आधारित हुने जनाएको छ । फिल्मलाई विशाल फुरियाले निर्देशन गर्नेछन् ।