साँफेबगर-मार्तडी जोड्ने सडक मर्मत कार्य अन्तिम चरणमा

कैलाली । करिब साढे तीन महिनादेखि अवरुद्ध अछामको साँफेबगरदेखि बाजुराको सदरमुकाम मार्तडी जोड्ने सडकको मर्मत कार्य अन्तिम चरणमा पुगेको छ । सडक डिभिजन साँफेबगर अछामका डिभिजन प्रमुख विवसबाबु सदादेवले बाजुराको बुढीगंगा नगरपालिका अन्तर्गत पर्ने सडक खण्डको मर्मत कार्य अन्तिम चरणमा पुगेको बताए ।

उनले गत असारको मध्यतिर आएको पानीका कारण सडक भास्सिँदा आवातजावत अवरुद्ध भएको बताए । करिब ८ सय मिटर सडकको मर्मत थालिएकोमा भोलिदेखि साना सवारीसाधन सञ्चालनमा आउने बताउँदै डिभिजन प्रमुख सदादेवले २/३ दिनभित्रै सडक पूर्ण रुपमा सञ्चालनमा आउने बताए । सडक अवरुद्ध हुँदा बाजुरामा खाद्यान्न, औषधि लगायतका अत्यावश्यक वस्तुको अभाव भएको थियो ।

---