इन्जिनियर अभावले विकास निर्माणको कामले गति लिएन : यातायात मन्त्री यादव

काठमाडाैँ - भौतिक पूर्वाधार तथा यातायात मन्त्री रेणुकुमारी यादवले मन्त्रालयको काममा खट्ने इन्जिनियरहरूको अभावको कारण विकास निर्माणको काममा तीव्रता दिन नसकिएकाे बताएकी छन् ।

सोमबार भएको प्रतिनिधि सभा अन्तर्गतकाे अर्थ समितिको बैंठकमा बोल्दै मन्त्री यादवले मन्त्रालयमा काममा खट्ने इन्जिनियरहरूको अभावको कारण विकास निर्माणको काम तीव्र गतिमा अगाडि बढ्न नसकेको बताइन् ।

---

मन्त्री यादवले पूर्वाधार निर्माणको काममा खट्ने इन्जिनियहरूको अभाव भएको र भएका इन्जिनियरहरू पनि पढाइलगायत विभिन्न बिदा लिएर काठमाडौंमा बस्न थालेकाले अझ बढी समस्या भएको जानकारी दिइन् ।

उनले यसरी विकास निर्माणको काममा खट्नु पर्ने इन्जिनियहरू अत्यावश्यक बाहेक बिदामा नबसी तत्काल काम गर्न आग्रह समेत गरिन् । पढाइको लागि छुट्टिमा मन्त्रालय तथा मन्त्रालय मातहतका ८० भन्दा बढी इन्जिनियरहरू बिदामा रहेको उनले बताइन् ।

मन्त्री यादवले भनिन्यो,‘पछिल्लो समय मन्त्रालयमा कर्मचारी अभावको रहेको छ । कर्मचारी अभावको कारण विकास निर्माणका योजनाहरू अगाडि बढ्न सकेको छैन । योजनाहरू अगाडि बढ्न नसक्दा पुँजीगत खर्च बढ्न सकेको छैन । त्यस्तै पछिल्लो समय पूर्वाधार निर्माणका लागि फिल्डमा खटिनुपर्ने इन्जिनियरहरू बिदामा बसेका छन्। त्यसले पनि १० जनाले गर्ने काम एक जनाले गर्नु पर्ने परिस्थिति रहेको छ । यस्तो अवस्था रहेकाले अत्यावश्यकबाहेक बिदामा बस्ने कर्मचारीहरूलाई तत्काल काममा फर्किन आग्रह गर्दछु। अहिले यसरी बिदामा बस्ने मन्त्रालय र मातहत निकायका मात्रै ८० भन्दा बढी इन्जिनियरहरू रहेका छन्। त्यस्तै मन्त्रालयमा कर्मचारी अभाव भएको बेलामा पढाइ बिदा लिएर काठमाडौंमा बसिरहँदा निर्माणको काममा बाधा पुग्ने गरेको छ । यसरी अहिले ८० जनाभन्दा बढी इन्जिनियरहरू बिदा लिएर काठमाडौंमा बसेका छन्।  इन्जिनियरहरूलाई काठमाडौंमा बसेर काम छैन । फिल्डमा जनशक्ति अभाव छ।’