प्रदेश २ का ६१० विपन्न परिवारलाई सरकारले घर बनाइदिने

जनकपुरधाम– प्रदेश नं. २ गरीब र विपन्न परिवारले घर पाउने भएका छन् । प्रदेश सरकारले प्रदेशभित्रका ८ वटै जिल्लामा यो योजना लैजानेछ ।

शुक्रबार बसेको प्रदेश मन्त्रिपरिषद्को बैठकले यस्तो निर्णय गरेको हो । प्रदेशको आठै जिल्लामा ६ सय १० जना विपन्नको घर निर्माण गरिने प्रदेश सरकारले जनाएको छ ।

---

बैठकले नेपाली कांग्रेसका नेता स्व. महेन्द्रनारायण निधिको नाममा विपन्न आवास योजना कार्यान्वयन कार्यविधि स्वीकृत गरेसँगै विपन्नले घर पाउने भएकोे प्रदेश सरकारका प्रवक्तासमेत रहेका अर्थ मन्त्री शैलेन्द्र साहले बताए । 

उनकाअनुसार घर बनाइदिनेबारे स्पष्ट नीति बन्नेछ। असहाय र विपन्न एकल महिला, आर्थिक रुपले विपन्न व्यक्तिको घर बनाउन प्राथमिकतामा राखिने उनले जानकारी दिए । त्यस्तै दलित, लोपोन्मुख, सीमान्तकृत जाति, अनाथ बालबालिका, अशक्त वृद्धवृद्धा पनि त्यसभित्र पर्नेछन्।

एक परिवारले करिब ५ लाख रुपैयाँ बराबरको घर पाउनेछन् । दुई कोठा, एक भान्छा अनि शौचालयसहतिको घर बनाइने भएको हो ।