सौरभको तेस्रो ‘असहमति’

काठमाडौँ : लेखक सौरभले ‘असहमति’ नाममै तेस्रो पुस्तक ल्याउँदै छन् । राजनीतिक विश्लेषक समेत रहेका सौरभको यो पुस्तक यसै चैत अन्तिम साता सार्वजनिक हुने भएको छ । बुक-हिल पब्लिकेसनले बिहीबार एक प्रेस नोट सार्वजनिक गर्दै सौरभको पुस्तक सार्वजनिक हुने जानकारी दिएको छ ।

‘इतिहास निर्माणका क्रममा गरिएका अपव्याख्या, नेपाली भूगोल, धर्म, भाषा, संस्कृति, सम्पदा, संस्कार, सभ्यता र जीवनशैलीप्रति बोलिएका धावाहरूको जवाफ दिने प्रयत्न सौरभले पुस्तकमा गरेका छन्’ बुक-हिलले जारी गरेको उल्लेख छ । 

---

पुस्तकबारे सौरभ भन्छन्, ‘कुनै पनि देशको अनुहार छिमेकीको जस्तो हुनुहुँदैन । उत्तरी र दक्षिणी मिलेर बेइमानीका लागि यही देशलाई तगारो बनाउने किन ? जो जति भौगोलिक विभाजनका कुरा गर्छ, इतिहासलाई गाली गर्छ । उति उसको पुर्खाले यो देशलाई कुनै योगदान दिएको रहेनछ भनेर म बुझ्ने गर्छु ।  पुस्तकमा मेरा यस्ता राजनीतिक विमतिहरू धेरै छन् ।'

६ वटा खण्डमा विभाजित पुस्तकमा ३३ वटा विचारोत्तेजक लेखहरू रहेका छन, विषयको विविधतामा यथेष्ट सूचना र सन्दर्भसहित गरिएका व्याख्या तथा विश्लेषणले सामाजिक-राजनीतिक डिस्कोर्सप्रति विमति जनाएका छन । तीन सय पृष्ठको पुस्तकको बजार मूल्य मोटो गाता ७ सय र पातलो गाता ५ सय रुपैयाँ रहेको छ ।