लमजुङमा राष्ट्रकवि घिमिरेको पूर्ण कदको शालिक निर्माण गरिने

काठमाडौँ- मर्स्याङ्दी वाङ्मय प्रतिष्ठानले लमजुङको गाउँसहरस्थित लमजुङ माध्यमिक विद्यालय प्राङ्गणमा राष्ट्रकवि माधवप्रसाद घिमिरेको पूर्ण कदको शालिक निर्माण गर्ने भएको छ ।

प्रतिष्ठानको आज सम्पन्न ‘२१औँ साधारणसभा तथा अधिवेशन’का अवसरमा आयोजित कार्यक्रममा प्रतिष्ठानका अध्यक्ष डा बमबहादुर थापा ‘जीताली’ले गाउँसहरस्थित लमजुङ माविको प्राङ्गणमा शालिक राख्न राष्ट्रकविको पूर्ण कदको शालिक निर्माण भइरहेको बताए ।

---

'लमजुङ दरबारलाई पर्यटकीय र साहित्यिक थलोका रूपमा विकास गर्न पूर्ण कदको शालिक निर्माण भइरहेको छ, चाँडै नै उक्त शालिकको अनावरण गछौँ,' उनले भने ।

प्रतिष्ठानका पूर्वअध्यक्षद्वय सोमकान्त अधिकारी र डा देवी सुवेदीले लमजुङमा छरिएर रहेका साहित्यिक प्रतिभालाई प्रतिष्ठानले खोजेर लमजुङको साहित्यिक अभियानलाई थप अगाडि बढाउनुपर्ने बताए । 

वरिष्ठ पत्रकार एवं प्रतिष्ठानका संस्थापक सदस्य सोमनाथ घिमिरेले राष्ट्रकवि माधवप्रसाद घिमिरेको अभाव मर्स्याङ्दी वाङ्मय प्रतिष्ठानलाई खड्किरहेको बताए ।

नवोदित कलेजका प्राचार्य राजेन्द्र अधिकारीले नयाँ विद्यार्थीलाई समेत साहित्यिक क्षेत्रमा सङ्लग्न गरी  साहित्यिक अभियानलाई थप अगाडि बढाउनुपर्नेमा जोड दिए ।

अध्यक्षमा विजयराज न्यौपाने निर्वाचित 

प्रतिष्ठानको आज सम्पन्न २१औँ साधारणसभा तथा अधिवेशनबाट साहित्यकार विजयराज न्यौपानेको अध्यक्षतामा नौ सदस्यीय कार्यसमिति निर्विरोध निर्वाचित गरेको छ ।

प्रतिष्ठानको उपाध्यक्षमा साहित्यकार भाग्यशाली अधिकारी, सचिवमा श्रीकृष्ण न्यौपाने र कोषाध्यक्षमा लक्ष्मण थापा चयन भएका छन् । यस्तै सदस्यमा कृष्ण अधिकारी, रामप्रसाद घिमिरे, अच्युत रेग्मी, अञ्जना पौडेल र यामबहादुर दुरा चयन हुनुभएको निर्वाचन समितिका सदस्य रामरञ्जन घिमिरेले जानकारी दिए।

नेपाली भाषा, साहित्य, कला, संस्कृति, ज्ञान विज्ञान, शिल्प एवं प्रविधिको अध्ययन अनुसन्धान तथा मौलिक सिर्जना संंरक्षणका लागि विसं २०५३ चैत २९ मा मर्स्याङ्दी वाङ्मय प्रतिष्ठानको स्थापना भएको हो ।