सिन्धुपाल्चोकका कसजूलाई 'जनमत जनक प्रधान सेवा' सम्मान

काठमाडौं– सिन्धुपाल्चोकका वरिष्ठ पत्रकार तथा साहित्यकार सुरेश कसजू सम्मानित भएका छन् । काभ्रेस्थित जनमत वाङमय प्रतिष्ठानको ३९ औं वार्षिकोत्सवको अवसरमा ‘जनमत जनक प्रधान सेवा सम्मान’बाट कसजूलाई सम्मान गरिएको हो ।

जनमत वाङ्मय प्रतिष्ठान, नेपालको आयोजनामा शनिबार बनेपामा भएको कार्यक्रममा कसजुलाई साहित्यकार तथा प्राध्यापक अभि सुवेदीले दोसल्ला ओढाएर सम्मान गरे । कसजू ४० को दसकदेखि साहित्य र पत्रकारितामा क्रियाशील छन् । सिन्धु साहित्यको विकास, संरक्षण र उत्थानमा महत्वपूर्ण भूमिका निर्वाह गरेबापत उनी सम्मानित भएका हुन् ।

---

उनले जुगल साहित्य मासिक, विप्लव मासिक लगायत पत्रपत्रिकामा सम्पादकको भूमिका निर्वाह गरेका थिए । दुःखी प्रकाशनमार्फत सर्जकहरुको साहित्यिक कृति प्रकाशन, नव सर्जकहरुका लागि प्रोत्साहन र संरक्षणको भूमिकामा कसजू लामो समयदेखि समर्पित छन् ।

गोरखापत्र संस्थानका पूर्व बोर्ड सदस्यसमेत रहेका कसजुको सम्पादकत्वमा सिन्धु सन्देश साप्ताहिक, सर्वपक्ष दैनिक, जुगल खबर अनलाईन सञ्चालन तथा प्रकाशन हुँदै आएको छ ।

कार्यक्रममा साहित्यकार श्रीओम श्रेष्ठ रोदन दीपा जनमत सम्मानबाट , भगवती अर्याल नवलपुर गणेश÷खिलकुमारी दुवाल जनमत सम्मानबाट, रामकुमार पाँडे ललितपुर, हृदयचन्द्र – जनमत वरिष्ठ साधक सम्मानबाट, सुमित्रा सुमी नुवाकोट केवलपुरे – जनमत सम्मानलगायत २८ जना श्रष्टा विभिन्न सम्मानबाट सम्मानित भएका छन् ।