जीवन क्षेत्रीद्वारा लिखित पुस्तक 'नुन-तेलः विगततिर पदयात्रा' सार्वजनिक

काठमाडौँ- जीवन क्षेत्रीद्वारा लिखित पुस्तक 'नुन-तेलः विगततिर पदयात्रा' को सार्वजनिक  भएको छ । पुस्तकको शनिबार केदारभक्त माथेमा, हिमा बिष्ट र केशव बोहराले एक कार्यक्रमबीच बिमोचन गरेका थिए।  सबैको साझा भविष्य पृथ्विमाथिको चासो र चिन्ताको सेरोफेरोमा लेखिएको पुस्तकमा लेखक क्षेत्रीले आफ्नो चार पुस्ताको कथा नुन-तेल मार्गको यात्राका अनुभव लेखेका छन् । 

पुस्तकमाथि बोल्दै केदारभक्त माथेमाले पुस्तकको लेखन शैली नयाँ किसिमको रहेको भन्दै पाठकलाई कतै आत्मकथा त कतै सामाजिक इतिहास पढेको महसुस गराउने बताए । लेखकको पर्यावरणप्रतिको चिन्ता पुस्तकमा प्रतिबिम्बित भएको बताउँदै माथेमाले पुस्तक पढ्न निकै स्वादिलो रहेको उल्लेख  गरेका थिए  ।

---

अर्का वक्ता हिमा बिष्टले नुन-तेल बसाइँसराइँलाई अतिरन्जना नगरी स्वअनुभवको आधारमा बसाइँसराइँलाई यथार्थमा बुझाउने किताब भएको बताए । पुस्तकले आफूलाई पनि आफ्नो जीवनको विगतलाई हेर्न झकझक्याएको उल्लेख गरेका थिए  । विष्टले भने- लेखकले इमान्दार भएर लेख्नुभएको छ । 'नुन-तेल'को यात्रा थुप्रैका लागि आफ्नो पारिवारिक बसाइँसराइँको यात्रा संस्मरण गर्न प्रेरक हुनेछ ।

त्यस्तै केशव बोहराले पुस्तकमा उल्लेखित केही प्रश्नहरु उदृत गर्दै 'नुन-तेल'ले पाठकलाई प्रश्न सोध्न प्रेरित गर्ने धारणा राखेका थिए । 'हामीले हामीभन्दा पिँधमा रहेका विशेषतः अल्पसंख्य समुदायलाई कसरी हेर्ने भन्ने दृष्टिकोण पुस्तकमा छ, उनको भनाइ थियो । पेसाले चिकित्सक क्षेत्रीको यो पहिलो पुस्तक हो । पुस्तकलाई साङ्ग्रिला बुक्सले बजारमा ल्याएको छ ।