मञ्जुश्रीको ‘एक्लै एक्लै’ सार्वजनिक

काठमाडौं– मञ्जुश्री थापाद्वारा लिखित अंग्रजी उपन्यास ‘अल अफ अस इन आवर लाइभ्स’ को नेपाली अनुवाद ‘एक्लै एक्लै’ सार्वजनिक भएको छ । उपन्यासलाई लेखक उज्ज्वल प्रसाईले अनुवाद गरेका हुन् । 

शुक्रबार ललितपुरको झम्सिखेलमा आयोजित एक कार्यक्रमा पुस्तक सार्वजनिक भएको हो । कार्यक्रममा अनुवादक प्रसाईले अनुवादका क्रममा भोगेका अप्ठ्यारा र रमाइला अनुभव सुनाएका थिए ।

---

लेखक थापाले अनुदित कृति अनुवादककै भएको बताएकी थिइन् । ‘अनुवादको कुनै पनि सन्दर्भमा मेरो कुनै ‘रिजर्भेसन’ छैन,’ उनले भनिन्, ‘लेखक जत्तिकै अनुदित कृतिको हकदार अनुवादक पनि हो ।’‘एक्लै एक्लै’ साङ्ग्रिला बुक्सले प्रकाशन गरेको हो । नेपालीमा अनुवाद गरिएको यो लेखक थापाका पहिलो उपन्यास हो । पुस्तकको मूल्य ५९५ रुपैयाँ राखिएको छ ।