सुदूरपश्चिमका मुख्यमन्त्रीले आज विश्वासको मत लिँदै, छैन पाउने आधार

काठमाडौँ - सुदूरपश्चिम प्रदेशका मुख्यमन्त्री कमल बहादुर शाहले आज (आइतबार ) विश्वासको मत लिने भएका छन् । मत लिनेबारे शाहले शुक्रबारनै प्रदेश सभालाई पत्र पठाएर जानकारी गराइसकेका छन् ।

उनले पठाएको पत्रअनुसार आइतबार दिउसो १ बजेका लागि प्रदेशसभा बैठक आह्वान गर्ने तयारी भइरहेको प्रदेश सभा सचिवालयका सूचना अधिकारी युवराज जैसीले बताए ।  ‘मुख्यमन्त्रीज्यूले २१ गते विश्वासको मत प्रयोजनका लागि आवश्यक व्यवस्थापन गरिदिन भनेर सचिवालयलाई पत्राचार गर्नुभएको छ,’ प्रदेश सभामुख भीमबहादुर भण्डारीले भने, ‘त्यसै अनुसार तयारी गर्न सचिवालयलाई निर्देशन दिइसकेको छु ।’

---

तर, मुखयमन्त्री शाहले विश्वासको मत पाउने भने निश्चित छैन । केन्द्रमा कांग्रेस, माओवादी, नागरिक उन्मुक्तिलगायत दलको समीकरण बने पनि प्रदेशमा भने माओवादी र नागरिक उन्मुक्ति पार्टीले विश्वासको मत नदिने निर्णय गरेका छन् । शाहलाई विश्वासको मत दिन दुई पार्टीले सर्त राखेपछि पुनः अन्यौल सिर्जना भएको छ । 

माओवादी केन्द्रले यथास्थितिमा मत दिन नसक्ने भन्दै केन्द्रीय कार्यालय, पेरिसडाँडालाई खबर गरेको छ भने उन्मुक्तिकी अध्यक्ष रञ्जिता श्रेष्ठले दलीय सहमतिको लिखित हस्ताक्षर बिना विश्वासको मत दिन नसकिने’ भन्ने प्रस्ट पारेकी छिन् । दुवै पार्टीले मन्त्रालय भागबन्डामा कांग्रेस अनुदार देखिएको भन्दै तत्काल मत दिन नसकिने जनाएका हुन् ।

५३ सदस्यीय प्रदेश सभामा बहुमतका लागि २७ मत आवश्यक पर्छ।

कांग्रेसका १९, माओवादीका सभामुखबाहेक १०,एमालेका १०, नागरिक उन्मुक्तिका ७, एकीकृत समाजवादीका ४ र राप्रपा र स्वतन्त्र १/१ सदस्य छ्न् ।

यसअघि गठबन्धनबाट नेकपा एमालेका राजेन्द्र सिंह रावल मुख्यमन्त्रीमा नियुक्त भएका थिए । रावलले तोकेको समयमा विश्वासको मत नपाएपछि ठूलो दलको हैसियतमा कांग्रेसका शाह मुख्यमन्त्रीमा नियुक्त भएका थिए ।