युद्धको भग्नावशेषलाई खेलमैदानमा परिणत गर्दै स्पाइडर्स पार्कोर समूह

प्यालेष्टाइनको गाजा क्षेत्रमा रहेको राफाहमा युवाहरूको एक समूहले माटोको ढिस्कोमा गर्ने 'समरसल्ट' (पार्कोर) ले बाटोमा हिँडिरहेका जोकोहीलाई केही समय उभिएर हेर्न बाध्य बनाउँछ ।

पछिल्लो समय स्पाइडर पार्कोर समूहका युवाहरूले राफाहमा विभिन्न शारीरिक क्रियाकलाप गरिरहेको पाइन्छ ।

---

खासमा गाजामाथि इजरायलले आक्रमण सुरु गरेपछि गाजा छाडेर भागेका कतिपय अहिले राफाहमा निर्माण गरिएको अस्थायी शिविरमा बस्दै आएका अल-जजिराले जनाएको छ । तर राफाह पनि इजरायली बम आक्रमणबाट अछुतो भने छैन । 

इजरायलले आक्रमण गरेपछि ती युवाहरूको घर ध्वस्त भए । साथै पार्कोर समूहका पाँच सदस्यको मृत्यु भयो । तर बाँच्न सफल भएका ती युवाहरू भने निडर छन् ।

साथै इजरायली बम आक्रमणका कारण ध्वस्त भएका भग्नावशेषलाई खेलमैदानमा परिणत गरेर उनीहरूलाई अत्यधिक मनपर्ने समरसल्टमार्फत आफूलाई युद्धको समयमा पनि आनन्दित तुल्याइरहेका छन् ।

उक्त समूहका एक सदस्य नाजेम अमारका अनुसार उनीहरूले वर्षौदेखि उक्त खेल खेल्दै आएका छन् र उनीहरूले सार्वजनिक स्थल तथा बालुवामा अभ्यास गर्ने गरेका छन् ।

तर जब युद्ध सुरु भयो अमार र उनका साथीहरूले भग्नावशेषलाई नै खेलमैदानको रुपमा परिणत गरे ।

अमारका अनुसार उनीहरूको बाँच्ने संकल्प पहिलेभन्दा झन बलियो भएको छ र उनीहरू समरसल्टकै माध्यमबाट इजरायली बम आक्रमणका कारण भएको क्षतिबारे विश्वलाई देखाउन चाहन्छन् ।

उनीहरू इजरायली बम आक्रमणका कारण ध्वस्त भएका भग्नावशेषमाथि उफ्रिन्छन्, चढ्छन्, दगुर्छन् र हाम फाल्छन् ।

विगत केही दशकदेखि गाजाका युवाहरू माझ पार्कोर निकै लोकप्रिय छ । तर गाजामाथि इजरायलको नियन्त्रणका कारण उनीहरूले अन्तर्राष्ट्रियस्तरमा आफ्नो क्षमता प्रदर्शन गर्न नसकेको उनीहरू बताउँछन् ।

तर युद्ध सुरु भएपछि उनीहरूले भग्नावशेषलाई नै उनीहरूको खेल्ने मैदानको रुपमा परिणत गरेका छन् । तथा मिसाइलका कारण पर्खालमा परेका प्वाललाई उनीहरू 'अब्सट्याकल' को रुपमा प्रयोग गर्ने गरेका छन् ।

उक्त समूहकै अर्का एक सदस्य मोहम्मद फावजीका अनुसार यसले आफ्ना सपना पूरा गर्न तथा उक्त खेललाई आफ्नो पहिचान बनाउनकालागि कुनै कुराले पनि छेक्न नसक्ने देखाउने बताए ।

खासमा स्पाइडर्स पार्कोर समूहको एउटै आशा भने भविष्यमा विदेशको यात्रा गर्न पाउने र अन्तर्राष्ट्रिय स्तरमा प्यालेष्टाइनको प्रतिनिधित्व गर्न सक्नेछ ।

(अल-जजिरामा प्रकाशित आलेखलाई इकागजका सञ्जीव शाहले भावानुवाद गरेका हुन् ।)