दरबारमार्गमा काली गुञ्जन

काठमाडौं - गायक तथा संगीतकार कालीप्रसाद बासकोटाले गत शनिबार काठमाडौंवासीलाई नचाएका छन् । कोभिड महामारीपछि पहिलोपटक दर्शकमाझ उपस्थित कालीले दरबारमार्गस्थित क्लब प्लाटिनममा उपस्थित दर्शकसँगै कलाकारहरुलाई ‘कालीप्रसाद बासकोटा लाइभ’मा आफ्ना गीतमार्फत नचाएका हुन् ।

कालीले आफ्नो प्रस्तुति दिनुअघि गायक उदिपध्वज थापाले गीत गाउँदा उनलाई गीतारमा चन्दनध्वज केसीले गीतार तथा स्वर र पुरस्कार खड्काले गीतारमा साथ दिएका थिए ।

---

रातिको ११ बजे स्टेजमा देखिएका कालीले ‘हेराईका थलहरू’सहित कुल ११ वटा आफ्ना गीत गाएका थिए । उनले ‘साइली’, ‘नाचन मैया नाचन’ गीत गाउँदा उनको गीत सुन्न अभिनेत्री स्वस्तिमा खड्का, निर्देशक निश्चल बस्नेत, संगीतकार न्ह्यू बज्राचार्य, गायिका इन्दिरा जोशी, निर्देशक अनमोल गुरुङ, हेमराज बिसी, गायक सनुप पौडेल र निर्देशक आसिफ शाह उपस्थित थिए ।

कार्यक्रममा निश्चलले कालीसँगै फिल्म ‘कबड्डी कबड्डी’को ‘नाचन मैया नाचन’ बोलको गीत गाएका थिए । यसै महिना नयाँ गीत ल्याउन लागेका गायक उदिपध्वजले एकै स्टेजमा कालीसँगै गीत गाउन पाउँदा खुसी लागेको बताए । पोजेटिभ भाइब्स इन्टरटेनमेन्टका प्रस्तुति र सुमन एम श्रेष्ठको संयोजनमा भएको कार्यक्रममा दर्शक निकै रमाएका थिए ।