अब इन्दिरासँग चोरीको ज्ञान र विचार सिक्ने जाने त ?

काठमाडौँ -  बिहेपछि श्रीमान्लाई समेत साथमा राखेर इन्दिरा जोशीले ‘पछ्यौरी’बोलको गीत सार्वजनिक गरेकी थिइन् । तर अंग्रेजी गीत‘डर्टी टक’को बिट थपक्क उठाएर संगीतकारमा आफ्नो नाम राखेकी इन्दिराका यो चोरी पक्डिन बेर लागेन ।

दर्शकले भोलिपल्टदेखि नै गीत अरुकै संगीत चोरेको पोल खोले । सञ्चारमाध्यममा समाचार आयो । तर इन्दिरा आफूले चोरेको स्वीकार्न तयार छैनन् । उनका अनुसार त्यो स्टाइल रे ! तर इन्दिरा यतिमै रोकिएकी छैनन् । उनले फेसबुकमा ‘डर्टी टक’ नै चोरेको प्रमाण दिँदै ‘बाल्कन बिट बक्स’को ‘हरमाटिका’को सेयर गरेकी छिन् । 

---

उनले इन्टरनेसनल स्टायललाई नेपालीमा समावेश नगरेकै बेश भन्दै लेखेकी छिन्, ‘अरुले त्यही काम गर्दा स्टाइल हुन्छ तर हामी आफूले प्रयोगमा ल्याउँदा कपी...साउन्ड र टेक्नोलोजीको प्रयोगमा हामी पछाडि छौँ । तर विचार र ज्ञानमा झन् पछि ।’

चोरी ढाक्न गरेको इन्दिराको यो तर्कले झन् उनकै पोल खुलेको छ । सर्जकले त सकभर आफ्नै मौलिक सिर्जनाको प्रयास गर्ने हो । अरुले चोरी गरेछ भने पनि हतोत्साह गर्ने हो । तर इन्दिराले त ‘डर्टी टक’ नै चोरेको रैछ भन्ने आसय व्यक्त गर्नुले अरुले चोर्न हुन्छ मैले किन नहुने ? भनेर उनले नै चोरी स्वीकारेकी छिन् । जहाँसम्म रह्यो दर्शक ज्ञान र विचारमा पछि परेको कुरा, यसमा यत्ति भनौँ, यस्तो चोर्ने ज्ञान र कुतर्क गर्ने विचार आउनुभन्दा यस्तो ज्ञान र विचार नआएकै वेश ।