मुरलीधरको ‘तिमीलाई रोजेँ’ फेरि रेकर्ड गर्दै राजेशपायल

काठमाडौं  - गायक राजेश पायल राईले गायक ,संगीतकार ,रचनाकार तथा कलाकार मुरलीधरको कालजयी गीत  ‘तिमीलाई रोजे’ आफ्नो स्वरमा रि–रेकर्ड गरी म्युजिक भिडियो सहित सार्वजनिक गर्ने भएका छन् । रेडियो नेपालमा रेकर्ड गरिएको मुरलीधरको आवाजमा समेत लोकप्रिय उक्त गीत पछि गायक पायलले ‘बैगुनी रैछौ मायालु’ एल्बममा आफ्नो स्वरमा रेकर्ड गरी सार्वजनिक गरेका थिए ।

पहिलो नेपाल आइडलमा अतिथिको रुपमा आउँदा उनले उक्त गीत प्रस्तुत गर्दा तानेको लामो  आलापले त्यसबेला निक्कै चर्चा पाएको थियो र युट्युब ट्रेन्डिङ्मा परेको थियो । बुधवार गुरु पूर्णिमाको  अवसर पारी गायक मुरलीधर र गायक राजेश पायल राईबीच उक्त गीतलाई पुनः नयाँ  साज सज्जाका साथ रेकर्ड गरी रिलिज गरिने आपसी समझदारी भएको छ । साथै राजेशपायलले मुरलीधरसँग नयाँ गीत संगीतको लागि समेत सहकार्य् गर्ने भएका छन् ।

---

‘राजेश  नेपाली संगीतको एक दरिलो खम्बा हो । उनीसँग मेरो सदैव हार्दिक सम्बन्ध छ र हामी दुईको सहकार्य नेपाली श्रोताहरूको लागि एउटा विशेष उपहार हुनेछ,’ गायक तथा संगीतकार मुरलीधरले बताए । राजेश पायल राईले पनि मुरलीधरको सो गीत आफ्नो प्रिय गीत रहेकाले पहिला पनि गाएको र नयाँ प्रविधिमा पुनः त्यसलाई गाउन चाहेको बताएका थिए ।  

राजेशपायलले भने,‘ ‘तिमीलाई रोजेँ गीत मलाई पनि असाध्यै मन पर्ने गीतहरु मध्ये एक हो र यस्को नयाँ भर्सनको लागि मुरलीधर दासँग पुनः सहकार्य भएको छ र मेरा सम्पूर्ण श्रोता तथा दर्शकहरुले यस्लाई पहिला भन्दा अझ मनपराउनु हुनेछ भन्ने मेरो विश्वास छ र त्यो विश्वास कायम राख्न म कटिबद्ध रहनेछु ।’