क्लब टेनएक्समा अनिलका गीत

काठमाडौँ- ​ ‘रेलिमोई’ सार्वजनिक गरेपछि गायनमा सक्रिय अनिल सिंहले क्लब म्युजिकल टूरमा व्यस्तता बढाएका छन्  ।अघिल्लो साता लन्डन पवमा आफ्नो प्रस्तुति दिएका अनिलले गएको शनिवार क्लब टेनएक्समा प्रस्तुति दिए । उनले म्युजिकल क्लब टुर अन्तर्गत कन्सर्ट गरिरहेका छन् । उनको म्युजिकल टुरमा ब्याण्ड पनि छ । ब्याण्ड ‘ग्रुभी सोल’ मा भोकलिस्ट अनिल छन् भने किबोर्डमा सुनिल सिंह, लिड गीतारिस्टमा अनिश मानन्धर, बेस गीतारिस्टमा सन्दीप गुरुङ्ग, ड्रमरमा प्रज्वल निर्वाण रहेका छन् ।

शनिवार भएको 'क्लब टेन एक्स' को कन्सर्टमा स्वदेशीसँगै विदेशी संगीतप्रेमी पनि उपस्थित थिए । आइ लभ यु, प्रेम पत्र, डुब्न देऊ, इन्जिन गाडीमा, प्रेमिका, मैले जानी सकेसँगै पछिल्लो गीत रेलिमोईसम्म उनले गाए । उनको गीतमा उपस्थित संगीत प्रेमी झुमे । कन्सर्ट झन्डै २ घण्टा जति चलेको थियो । अनिलको हिट गीतहरु 'वान्स मोर' का कारण झन्डै २ पटक गाउन् बाध्य भएका थिए ।

---

'दर्शकको मायाले उत्साहित छु । यो म्युजिकल टुरलाई अझै विभिन्न क्लब र स्थानमा लान्छु' अनिलले भने । उनले यी सब योजना अनुसार नै अगाडि बढेको बताए । ‘योजना अनुसारनै काम अगाडी बढाइरहेको छु । क्लबहरुमा म्युजिकल टुर पश्चात विदेशमा पनि गर्ने तयारी हुँदैछ’ अनिलले भने । केही समय कन्सर्टमा मात्र केन्द्रित अनिलले पछिल्लो समय गीत संगीत सिर्जनामा पनि उत्तिकै समय दिइरहेका छन् । ‘हामीले एउटा समयमा गरेको कामसँगै अहिले अपडेट भएर, ट्रेन्ड बुझेर आउनु पर्छ’ अनिलले भने । उनले आफू गीतसंगीतसँगै अन्य विविध कामहरूमा रहेको पनि बताएका छन् ।

आफ्नो गीत र गतिविधिलाई जानकारी गराउने उद्देश्यले उनले ‘म्युजिक स्टेट’ नामक च्यानल बनाएका छन् । ‘म युट्युबको लागि नयाँ छु । किनकि यसको लोकप्रियता बढेपछि म गीतसंगीत लिएर आएको छैन । अब भने सक्रियता बढाउँदैछु’ उनले भने । साथै, उनले आफ्नो सफल गीत इञ्जिन गाडीमा २ र आइ लभ यु २ गीत छिटै दर्शक समक्ष ल्याउँदै छन् । उनले आफ्नो हिट गीतहरुको नयाँ सिर्जनालाई ‘द ग्रेट हार्मोनिस्ट २’ एल्बममा संग्रहित गर्दैछन् । यसपटक उनले आफ्नै हिट एल्बम ‘द रियल हार्मोनिस्ट’ कै नाम सापटी लिँदै एल्बम नै तयार गर्न लागेका हुन् ।