फिल्म निर्देशनमा डेब्यू गर्दै टेलर स्विफ्ट

लसएन्जल्स-  ग्रामी अवार्ड विजेता गायिका टेलर स्विफ्टले फिचर फिल्म निर्देशनमा डेब्यू गर्ने भएकी छिन् । सर्चलाइट पिक्चरले निर्माण गर्ने सिनेमाको पटकथा पनि टेलर स्वयंको रहनेछ । डिज्नेको भगिनी कम्पनी सर्चलाइटले यसअघि ‘दि सेप अफ वाटर’, ‘नोमड ल्यान्ड’ जस्ता फिल्म बनाएको थियो । यो साल अस्करमा मुख्य दाबेदार मानिएको ‘दि बन्सिस अफ इनसिरिन’ पनि सर्चलाइटले नै बनाएको हो । सर्चलाइटले टेलरले फिल्म निर्देशन गर्ने खबर सत्य रहेको बताए पनि विषय वस्तुको बारेमा भने बोल्न चाहेन । 

‘टेलर यो पिंढीको दुलर्भ कलाकार र कथावाचक हुन् । उनको नयाँ रचनात्मक यात्रामा सहयात्रा गर्न पाउँनुलाई कम्पनीले अवसर ठानेको छ,’ सर्चलाइटका अध्यक्षले भनेका छन् । टेलरले यही साल मात्र एमटीभी म्युजिक अवार्डमा भिडियोमा निर्देशकको रुपमा ह्याट्रिक गरेकी थिइन् । टेलरलाई लामो म्युजिक भिडियो निर्देशन गर्ने दोस्रो महिला मानिन्छ जसले सन् २०२१ मा ‘अल टु वेल ः दि सर्ट फिल्म’ निर्देशन गरेकी थिइन् । 

---

टेलरले अहिलेसम्म ११ वटा ग्रामी जितेकी छिन् भने तीन पल्ट एल्बम अफ दि इयर जित्ने एक मात्र गायिका हुन् । उनको १० मिनेट लामो ‘अल टु वेल ः दि सर्ट फिल्म’लाई यो पटक अस्करमा समेत मनोनयनमा पर्न सक्ने फिल्ममा रुपमा हेरिएको छ ।