स्पेस टेलिभिजनमा एक साथ तीन रियालिटी सो

काठमाडौँ-  स्पेस फोर के टेलिभिजनले तीन वटा रियालिटी सो घोषणा गरेको छ। टेलिभिजनले बालबालिकाको लक्षित ‘जस्ट डान्स लिटिल मास्टर्स’, युवाको लागि गायनमा र्याप स्टार’ र डेटिङ गेम सो ‘फस्ट डेट’ घोषणा गरेको हो।

काठमाडौंको एभरेष्ट होटलमा पत्रकार सम्मेलन गर्दै टेलिभिजनले एकैसाथ तीनवटा रियालिटी सोको टिजर र त्यसको अवधारणा सार्वजनिक गर्नुका साथै सबै सोका निर्णायक, निर्देशक र टिमसमेत सार्वजनिक गरेको छ। पत्रकार सम्मेलनमा तीन वटै रियालिटी सोका निर्णायक तथा निर्देशकले आ–आफ्नो सोका बारेमा जानकारी गराएका थिए।
 
र्याप स्टारको निर्णायकमा चर्चित र्यापर गिरिश खतिवडा, सन्दिप बिस्ट अर्थात् मिस्टर डी  र अभिजित भण्डारी एजे रहेका छन्।
त्यसैगरी, जस्ट डान्स लिटिल मास्टर्समा नायिका सञ्चिता लुईटेल, कोरियोग्राफर प्रदीप लामा, बलिउडमा काम गरेर चर्चा कमाएका हिपहप डान्सर प्रकाश बिके रहेका छन भने फस्ट डेटका क्रियटर तथा प्रोजेक्ट हेड चर्चित नायक तथा प्रस्तोता रेमन्ड दास श्रेष्ठ, क्रियटिभ हेड सन्जिप रत्न शाक्य र निर्देशक नेपालकै कान्छा रियालिटी सो निर्देशक आश्विन न्यौपाने रहेका छन्।

कार्यक्रममा स्पेस फोर के टेलिभिजनका अध्यक्ष डा दिनेशकुमार शाहीले नेपाली समाजमा लुकेर रहेका प्रतिभा क्षमतालाई अन्वेषण गर्ने र त्यस्ता क्षमतालाई स्थापित गरेर देशमा सकारात्मक सन्देश फैलाउन रियालिटी सो ल्याइएको बताए। कार्यक्रममा जस्ट डान्स लिटिल मास्टरर्सका निर्णायक तथा नायिका सञ्चिता लुइटेलले बच्चाको बालमनोविज्ञानमा आधारित भएर बालबालिकामा रहेको क्षमतालाई प्रष्फुटन गर्न यो शोले महत्वपूर्ण योगदान गर्ने बताईन्।

त्यसैगरी, र्याप स्टारका निर्णायक तथा र्यापर गिरिश खतिवडाले नेपाली समाजमा ‍र्यापलाई हेर्ने दृष्टिकोण फरक भए पनि र्‍याप विधाले समाजको चित्रण गर्ने बताए। सभ्य र भव्य रुपमा र्यापलाई अगाडि बढाउनेमा आफू विश्वस्त रहेको भन्दै धेरै भन्दा धेरै र्याप विधाका प्रतिभाहरुलाई खोजि गरेर देखाउने बताए।

 प्रेमिल जोडीहरुमा आधारित भएर निर्माण गरिएको डेटिङ रियालिटि सो फस्ट डेटले दर्शकलाई मनोरञ्जन दिनुका साथै सपरिवार हेर्न मिल्ने गरी सभ्य तरिकाले निर्माण गरिने सर्जक रेमन दास श्रेष्ठले बताए ।

डेटिङ रियालिटी सो फस्ट डेट  यही १४ फेब्रुअरी आर्थत प्रणय दिवसलाई लक्षित गरेर ल्याउदै छन् भने  डान्स रियालिटि सो जस्ट डान्स लीटिल मास्टर्स आउँदो वैशाखमा प्रशारण गर्नेछन्।  सिङ्गिङ रियालिटी सो र्याप स्टार पुस महिनादेखि स्पेस फोर के टेलिभिजनबाट प्रसारण हुने जनाइएको छ।

---