हिमाल सागरको गीतमा पल र समीक्षाको सहकार्य

काठमाडौँ -  बजारमा पल शाह र समीक्षा अधिकारीको अफेयरको चर्चा चलिरहँदा दुवैको सहकार्य रहेको अर्को गीत सार्वजनिक भएको छ । सोमबार सार्वजनिक भएको ‘मायाले मायाले’ बोलको गीतमा समीक्षा अधिकारीको स्वर रहेको गीतमा पल शाहले मोडलिङ गरेका छन् । अर्जुन पोखरेलको संगीत रहेको गीतमा पुरुष स्वर भने हिमाल सागरको रहेको छ । 

गायक हिमाल सागर र गायिका समीक्षा अधिकारीको स्वर, दीपक प्रसाद वलीको शब्द तथा अर्जुन पोखरेलको संगीतमा तयार भएको ‘मायाले मायाले’ बोेलको गीतको भिडियो काठमाडौंमा एक कार्यक्रमको आयोेजना गर्दै सार्वजनिक गरिएको छ ।

---

यो गीतमा लाहुर गएको एक युवा, उसको सम्झनामा बसेकी एक युवती र युवतीलाई मन पराउने एक पुरुषको कथा भन्छ ।संगीतकार अर्जुन पोखरेलले यो गीतलाई लोक शैलीको डान्सर नम्बर भनेका छन् । यस्तै, यो गीतका गीतकार दीपक प्रसाद वलीले आफू आइसीयूमा रहेको समयमा यो गीत कोरेको बताए ।

यो गीतको भिडियोमा नायक पल शाह, नायिका पुजा शर्मा र कलाकार जितु नेपालको अभिनय छ । गीतमा तिनै कलाकारले बेजोड नृत्य गरेका छन् । गीतमा विकास दाहालको सम्पादन, उत्सव दाहालको छायांकन, गम्भिर बिष्टको कोरियोग्राफी, माधव शर्माको एसोसियट निर्देशन रहेको छ ।

निर्देशक विधान कार्कीले विभिन्न समस्याका बाबजुद पनि भिडियो तयार भएको बताए । उनले, अर्जुन पोखरेलको संगीतमा पुजा, पल र जितु नेपाललाई लिएपछि भिडियो उत्कृष्ट बनाउने चुनौती आफूमा रहेको र त्यसलाई केही हदसम्म पूरा गरेको सुनाए ।कार्यक्रममा बोल्दै कलाकार जितु नेपालले आफूले म्युजिक भिडियोमा काम नगरे पनि गीत र भिडियोको कथा सुनेपछि काम गर्न उत्साहित भएको बताए । यस्तै, नायिका पूजा शर्माले एउटा राम्रो गीतमा राम्रो टिमसँग टिमअप गरेको सुनाइन् ।