राजेश हमालको हातबाट फुटबल खेलाडी अस्मितालाई सहयोग

काठमाडौँ - नेपाली चलचित्र क्षेत्रका खम्बा महानायक राजेश हमाल अभिनित नयाँ म्युजिक भिडियो ‘डाँडापारी’ सार्वजनिक गरिएको छ । बिहीबार काठमाडौंको ठमेलस्थित अलफ्ट होटलमा एक विशेष समारोहकाबीच गीतको प्रिमियर गरिएको हो । 

रामकृष्ण ढकाल र कविता श्रेष्ठको स्वर रहेको गीतमा यमु शर्मा सुब्बाको शब्द र संगीत रहेको छ । भिडियोमा राजेश हमालसँगै गीता ढुंगानाको अभिनय छ । कार्यक्रममा प्रमुख अतिथि तथा गीतका मुख्य कलाकार हमालले ‘डाँडापारी’ गीतमा अभिनय गर्न पाउँदा खुसी लागेको बताउँदै गीतकार तथा संगीतकार यमुलाई सम्झिए । ‘विदेशमा रहेर पनि यमु शर्माजीले गीतसंगीतप्रति देखाएको माया प्रशंसनीय छ ।

---

यमु शर्मा भन्ने बित्तिकै उहाँले नेतृत्व गरिरहनु भएको मेची महाकाली बुहारी संयुक्त आवाज पनि जोडिन्छ । संस्थाले महिलाको हकहितका लागि गरेको काम देख्दा खुसी लाग्यो ’ हमालले भने । कार्यक्रममा गीतका गायक रामकृष्ण ढकाल र गायिका कविता श्रेष्ठले राम्रो गीत गाउने अवसर दिएको भन्दै गीतको निर्माता, गीतकार तथा संगीतकार यमुलाई धन्यवाद दिए । भिडियोको निर्देशन आयुष क्षेत्रीले गरेका हुन् भने  छायाँकन गरेका हुन्, ज्ञानेन्द्र शर्माले । भिडियोमा अविनाश डिसी र भुपेन्द्र अधिकारीको सम्पादन रहेको छ ।

कार्यक्रममा मेची महाकाली बुहारी संयुक्त आवाजको तर्फबाट महिला फुटबल खेलाडी अस्मिता रनपललाई हमालको हातबाट ५० हजार रुपैंया हस्तान्तरण गरियो । राष्ट्रिय तथा अन्तराष्ट्रियस्तरमा फुटबल खेलेर देशभर नाम कमाइसक्दा पनि आर्थिक स्थिति दयनीय भएको भन्दै भोलिको दिनमा खेल्नमा थप हौसला बढोस् भन्दै संस्थाले रकम हस्तान्तरण गरेको हो । अस्मिता अभिनेता हमालको हातबाट रकम ग्रहण गर्न पाउँदा भाग्यमानी महसुस गरेको भन्दै भावुक भएकी थिइन् ।