शिव पुरीको निर्देशनमा 'तिमी पुग्यौ टाढा' सार्वजनिक

काठमाडौँ- रजिना रिमाल र नविन खनालको स्वर रहेको गीत ‘तिमी पुग्यौ टाढा’ सार्वजनिक भएको छ । बुढासुब्बा डिजिटलबाट सार्वजनिक भएको गीतको भिडियोमा शिव पुरीको निर्देशन रहेको छ । भिडियोलाई पुरीलेनै सम्पादन समेत गरेका हुन् । प्रेम, मिलन र मिलन पछिको संघर्ष र पीडालाई विषय बनाएर निर्माण गरिएको भिडियोमा दृश्य सुवेदी र रुशा न्यौपाने फिचर भएका छन् । 

अडियो भिजुअल इण्डलेस सोलुसनको प्रस्तुति रहेको गीतमा गणेश खड्काको शव्द, गायक खनालकै संगीत र रिकेश गुरुङको संगीत संयोजन रहेको छ । भिडियोमा केही दृष्यहरुलाई डा «मेटिक प्रिजन्टेसनको रुपमा प्रस्तुत गरिएको छ जसमासाउण्ड डिजाइनको काम किशोर आचार्यले गरेका छन् । प्रोडक्सन डिजाइन राम तिमल्सेनाको रहेको गीतको कन्सेप्ट र स्टोरी विनोद श्रेष्ठको हो । हरि हुमागाईको छायांकन रहेको गीतको भिडियोमा कलर श्याम कुँवरले गरेका छन् भने रामकुमार श्रेष्ठ मुख्य सहायक निर्देशक हुन् ।

---

जीवनमा चाहना र दृढ इच्छा शक्ति हुने हो भने जस्तो सुकै कठीन परिस्थितिमा पनि सफलता प्राप्त गर्न सकिन्छ भन्ने विषयलाई भिडियोमा कलात्मक ढंगले प्रस्तुत गरिएको छ । निर्देशक पुरीले यो भिडियोलाई म्युजिक भिडियो भन्दा पनि एउटा म्युजिकल फिल्मको रुपमा उतारिएको र बर्षौंको कथा केही मिनेटमा उतार्न कोशिष गरीएको वताउँछन् ।

पुरीले यस अघि पनि अन्य छोटा चलचित्रहरु, वृत्तचित्रहरु, म्युजीक भिडियोहरुका साथै अनिल गुरुङ्गको जीवनीमा आधारित चलचित्र भकुण्डोको निर्देशन एवं सम्पादन गरेका छन् । पनौती र काठमाडौंका विभिन्न स्थानहरुमा छायांकन गरिएको भिडियो साँचिकै मन छुने खालको बनेको छ ।