के अन्जु पन्त पनि अमेरिकै बस्‍न लागेकी हुन् ?

काठमाडौँ - विवाह गरे लगत्तै अमेरिका गएकी अन्जु पन्त लामो समय भयो नेपाल फर्किएकी छैनन् । नेपालमा छँदा एउटा स्टुडियोदेखि अर्को स्टुडियो कुद्न भ्याइनभ्याई हुने अन्जु पन्त अमेरिकामा भने फाट्टफुट्ट गीत रेकर्डिङमा छिन् ।

नेपालका स्टुडियो माया मारेर उनी अमेरिकामा रमाउन थालेको लामै समय भइसक्यो । नेपाली कलाकार अमेरिकामा जाँदा बस्दै गरेकाले अन्जु पन्त पनि अब नफर्कन गरी नै जान लागेकी हुन् कि भन्ने धेरैको शंका छ । 

---

तर अन्जु पन्तका श्रीमान थिर कोइरालाले भने अमेरिका आएको काम नसकिएकाले बसाइ लम्बिएको बताएका छन् । उनले केही दिनमै काम सकिने बित्तिकै अन्जु नेपाल फर्कने जानकारी गराए ।‘ हामी आएको काम अलिकति सक्न बाँकी छ । त्यो सकिने बित्तिकै आउँछौँ । सम्भवतः अर्को महिना हामी नेपाल फर्किन्छौँ,’ उनले इकागजको भर्चुअल कुराकानीमा भने । 

सानो उमेरदेखि गाउन थालेकी अञ्जु पन्त सबैभन्दा लामो समय गाउने गायिका हुन् । समकक्षी मात्र हैन, उनीपछि आएका धेरै गायिका पुराना भइसक्दा पनि अञ्जु भने अहिले पनि संगीतकार तथा गीतकारका लागि पहिलो रोजाइकी गायिका हुन् । उनले अघिल्लो सालको फ्रेब्रुअरीमा विवाह गरेकी थिइन् ।