देशको राजधानी काठमाडौँ नभएर अन्यत्रै हुनुपर्छ – बालेन शाह

काठमाडौँ– देशको राजधानी काठमाडौँ नभएर अन्यत्रै हुनुपर्ने काठमाडौँ महानगरपालिकाका स्वतन्त्र उम्मेदवार बालेन शाहले बताएका छन् । उनले आज काठमाडौँको नाथम कलेजमा भएको ‘मैले देखेको समाज’ कार्यक्रमको १२ औ शृङ्खलामा अतिथिको रूपमा बोल्दै यस्ताे बताएका हुन् । 

‘कमन एक्सन फर सोसल ट्रान्सफरमेसन’ नामक संस्थाले गरेको उक्त कार्यक्रममा बोल्दै उनले काठमाडौँ उपत्यका नै संग्राहलय जस्तो भएकाले राजधानी भन्दा पनि म्युजियम सहरका रूपमा संरक्षण गर्नुपर्नेमा जाेड दिए । 

---

‘यहाँको सांस्कृतिक सम्पदा, चाडपर्व, जात्रा, मेलाहरूका कारण एकदम सुन्दर स्थान हो’ उनले भने, ‘यति सुन्दर स्थान देशको राजधानी हुँदा देशभरिमा हुने आन्दोलन यही हुने भयो । यहाँ संसद् भवन भएका कारण सधैँ जसो आन्दोलनका कार्यक्रम हुन्छन् । त्यसैले देशको राजधानीको लागि अन्यत्र विकल्प खोज्नु पर्छ ।’ 

उनले काठमाडौँ सुन्दर, शान्त र  स्निग्ध हुनुपर्ने उल्लेख गरे । 

शाहले उक्त कार्यक्रममा आफ्नो कलाकारिता, इन्जिनियरीङदेखि देश कै ठूलो महानगर काठमाडौँमा मेयरको उम्मेदवारी घोषणा गर्दासम्मा आफ्ना अनुभवहरू राखेका थिए । 

शाहले उक्त कार्यक्रममा काठमाडौँमा प्रशस्त  खुल्ला स्थानहरू हुनुपर्ने बताए । 

‘पछिल्लो समय एकदमै धेरै बलबालीकाहरुले आत्महत्या गरेको सुन्ने गरिन्छ । यसको कारण बालबालिकाहरू खेलकुदमा सहभागी नभएकाले हो’ उनले भने ‘प्रविधिले हामीलाई जित्न मात्रै सिकाएको छ । उनीहरू सानो सानो हारमा पनि एकदमै निराश हुन्छन् । तर खेलले शारीरिक रूपमा मात्रै हैन मानिसिक रूपमा पनि बलियो बन्न सिकाउँछन् । उनीहरूले सानो सानो हुँदा निराश हुनु हुँदैन भन्ने सिक्छन् ।’

कमन एक्सन फर सोसल ट्रान्सफरमेसनले ‘मैले देखेको समाज’ विगत पाँच वर्षदेखि धारावाहिक कार्यक्रम गर्दै आइरहेको छ । कार्यक्रममा अतिथि वक्ताले आफूले भोगेको र देखेको समाजका बारेमा बताउने गरेका छन् ।