रीनाको नृत्य यात्रा : ‘प्रतिभाको आँगन’ देखि लोकदोहोरीको मोडलसम्म

काठमाडौँ-  नृत्यमा सानैदेखि मोडल रीना थापा मगरको प्यासन थियो । तर, त्यही प्यासनलाई प्रोफेसन बनाउनेबारे भने उनले सोचेकी थिइनन् । नृत्यमा रुचि भएकाले उनी नृत्य प्रतियोगिताहरूमा भाग लिइरहन्थिन् । यसै क्रममा एनटीभी प्लसबाट प्रसारण हुने डान्स रियालिटी सो ‘प्रतिभाको आँगन’मा रीना सहभागी भइन् । प्रतिभाको आँगनमा उनी प्रथम भइन् ।

सन् २०११ यता उनी लोकदोहोरी म्युजिक भिडियोहरूमा व्यस्त छिन् । ‘प्रतिभाको आँगनमा पहिलो भएपछि लोकदोहोरी भिडियोका लागि अफर आउन थाल्यो,’ उनले सुनाइन्, ‘त्यो बेलादेखि अहिलेसम्म निरन्तर यसै क्षेत्रमा काम गरिरहेको छु । म विशेषगरी डान्सिङ बिटका लोकदोहोरी गीतहरूमा काम गर्न रुचाउँछु ।’ 

---

रीनाले प्यासनलाई प्रोफेसन मात्र बनाइनन् । पढाइको विषय पनि नृत्य नै रोजिन् । पद्मकन्या क्याम्पसबाट उनले कल्चरल नृत्यमा ब्याचलर्स गरेकी छिन् । उनी नृत्यमै मास्टर्ससमेत गर्ने विचारमा छिन् । ‘नृत्यमा रुचि भएकाले त्यसैलाई मुख्य विषय बनाएर पढ्ने ठूलो रहर थियो,’ उनले भनिन्, ‘नृत्यमा परिवारको पनि राम्रै साथ र सहयोग मिल्यो ।’ 
पढाइ, प्यासन र प्रोफेसन तीनवटैको तालमेल मिल्दै गएपछि रीनाको व्यस्तता बढ्दै गयो । ‘एकताका सुत्ने, उठ्ने खाने केही कुराको पनि ठेगान हुँदैनथ्यो,’ उनले आफ्ना संघर्ष सुनाइन्, ‘मैले पाँच÷छ वर्षअघि तीजको बेलामा एकैदिन पाँचवटासम्म भिडियोमा नृत्य गरेको छु ।’ 

रीनाले हालसम्म दुई हजारभन्दा बढी म्युजिक भिडियोमा मोडलिङ गरिसकेकी छन् । अहिले पनि उनको दैनिकी लोकदोहोरी म्युजिक भिडियोहरूमै बितिरहेको छ । तर, अहिले लोकदोहोरी म्युजिक भिडियोको चार्म पहिलाजस्तो नभएको उनको अनुभव छ । ‘अहिले पहिला जस्तो दिनको पाँच÷छ वटा म्युजिक भिडियो काम गर्ने अवस्था त छैन । तर, फुर्सदमा पनि बस्नु परेको छैन ।’ कोभिडले अरु पेसा जस्तै म्युजिक क्षेत्रलाई पनि धक्का दिएको उनले बताइन् । अहिले बिस्तारै लयमा फर्किएकाले उनी आशावादी छिन् । 

रीनालाई आधुनिक गीतको भिडियोमा पनि अफर आउँछ । तर, उनी आधुनिकभन्दा लोकदोहोरी गीतमै मोडलिङ गर्न रुचाउँछिन् । ‘मलाई आधुनिकभन्दा लोकदोहोरी भिडियोमै सुहाउँछ जस्तो लाग्छ,’ उनले भनिन्, ‘त्यसैले पनि मेरो पहिलो रोजाइ लोकदोहोरी म्युजिक भिडियो नै हुन्छ ।’

रीना मोडलिङकै माध्यमबाट उनी देश विदेश पुगिसकिन् । साँस्कृतिक कार्यक्रमको सिलसिलामा उनी देशका थुप्रै जिल्ला पुगिसकिन् । विदेशमा पनि जापान, कोरिया, मलेसिया, दुबै, कतार, बंगलादेशलगायत दर्जन देशमा पुगिसकिन् । ‘अरु क्षेत्रमा भएको भए यस्तो अवसर विरैल पाइन्थ्यो होला,’ उनले भनिन्, ‘यो क्षेत्रमा लागेर मैले आफ्नो संस्कृतिलाई धेरै देशमा लैजान सकेँ । नृत्यले मलाई धेरैथोक दिएको छ ।’

रीनालाई  फिल्ममा अभिनय गर्नमा भने रुचि छैन । तर, उनले पाँच÷छ वटा फिल्मका आइटम गीतमा नाचिसकेकी छिन् । ‘आइटम डान्स पनि मलाई मन पर्छ,’ उनले भनिन्, ‘अभिनयभन्दा नृत्यमै रमाएको हुनाले अभिनयतिर लाग्ने भने सोचेको छैन ।

अहिले मलाई लोकदोहोरी गीतमै ठीक छ ।’ रीना मारुनी, मैथिली, चर्या र काँठेदेखि थारू र देउडा नृत्यमा समेत पोख्त छिन् । लोकदोहोरी म्युजिक भिडियोमा दशकभन्दा लामो समय बिताइसकेकी रीना अझै पनि धेरै कुरा सिक्न बाँकी भएको बताउँछिन् । भविष्यमा नृत्य क्षेत्रमै रहेर काम गर्ने उनको योजना छ ।