पोखरा : आइतबार बागलुङमा २ जनाको ज्यान जाने गरी भएका घटनापछि बागलुङ बडिगाड गाउँपालिका दर्लिङ गाउँका युवाहरू फरार भएका छन् । जिल्ला प्रहरी कार्यालय, बागलुङका प्रहरी प्रमुख कृष्णबहादुर पल्ली मगरका अनुसार दर्लिङका युवाहरू फरार रहेका हुन् ।
 
‘गाउँमा हाम्रो प्रहरी टोली परिचालित छ, दर्लिङका युवाहरू भागेका छन्, उनीहरू नै आरोपी हुन्,’ मगरले भने । होली खेल्न बल्देधुरी पुगेका निसिखोलका ३६ वर्षीय प्रकाश कुँवर र ३४ वर्षीय दीपक दमाइको आइतबार ज्यान गएको थियो । मेलामा झगडा भएपछि उनीहरूलाई भीरबाट धकेलिएको थियो । भीरबाट धकेलिएका २ जनाको शव आइतबार नै फेला परेको थियो ।

एक महिलालाई रङ दलेको विषयमा विवाद उत्पन्‍न भएको बताइन्छ । झगडा बढ्दै गएपछि प्रकाश त्यहाँ पुगेका थिए । ‘झगडा मिलाउन’ त्यहाँ पुगेका प्रकाशमाथि नै ती युवाहरू जाइ लागे । उनीहरूमात्रै जाइ लागेनन्, अरु पनि त्यहाँ थपिए । दीपक भने प्रकाशसँगै झगडा भएको ठाउँ पुगेका थिए ।

---

‘उनीहरू झगडाको मनस्थितिले गएको देखिँदैन, निर्घात कुटेर धकेलिदिएछन्,’ निसिखोला-९ का वडाध्यक्ष तेजेन्द्र कुँवरले भने ।

दर्लिङका स्थानीय भने राजकुटका केही युवाले जबरजस्ती युवतीहरूमाथि रङ दल्दा झगडा भएको बताउँछन् । राजकुटका युवाहरू रक्सी खाएर त्यो भीरमा पुगेको र त्यहाँ झगडा हुनुपूर्व केही तल दर्लिङका केही युवालाई राजकुटका युवाले हातपात गरेको एक स्थानीयले बताए । 

बडिगाड गाउँपालिका १० का वडाध्यक्ष वीरेन्द्र बुढाले पहिला राजकुटका युवाले दर्लिङका युवामाथि हातपात भएपछि विवाद उत्पन्‍न भएको बताउँछन् । ‘राजकुटकाले हाम्रालाई कुटेछन्, अनि हाम्राले कुटेको भनेर मलाई खबर गराएका छन्,’ बुढाले भने । 

निसिखोला-९ का वडाध्यक्ष कुँवर भने राजकुटका युवालाई दर्लिङका युवाले कुटेको र अहिले मृतकमाथि आरोप लगाउन खोजिएको बताउँछन् ।

‘प्रकाशहरू त कहिल्यै झगडा गरेनन्, सामाजिक काममा लागेका मान्छे थिए उनी, दोषबाट बच्न उताकाले हाम्रालाई आरोप लगाए,’ कुँवरले भने ।

मृतकको शव अहिले अस्पतालमा राखिएको छ । शवको व्यवस्थापन गर्ने वा कुनै कदम चाल्नेबारे पार्टीमा छलफल भइरहेको कुँवरले बताए । कुँवरका अनुसार यसअघि पनि त्यो ठाउँमा पटक-पटक झगडा हुने गरेको थियो । यसअघि पनि सोही ठाउँमा पटक-पटक २ गाउँबीच झगडा हुने गरेको बताइन्छ । ‘प्रशासनले किन उनीहरूलाई समातेको छैन ? यस्तो घटनामा त जतिसक्दो छिटो समाउनुपर्थ्यो,’ कुँवरले भने ।

वडाध्यक्ष कुँवरले ती थपिएका पुरुषहरूले राजनीतिको विषय उठाएको बताउँछन् । माओवादीका कार्यकर्ताले पहिला झगडा साँधेर पिटेको कुँवरले बताए । ‘माओवादीका जिम्मेवार व्यक्ति आएर कुटेछन्,’ कुँवरले भने । प्रकाश नेपाली कांग्रेस बागलुङ जिल्ला कार्यसमिति सदस्य हुन् भने दीपक कांग्रेस कार्यकर्ता हुन् ।

कुँवरका अनुसार यसअघि पनि पटक-पटक माओवादीका कार्यकर्ता र उनीहरूबीच भनाभन हुने गरेको थियो । घटनामा कांग्रेसका १२-१५ जना घाइते रहेको कुँवरले बताए । ‘हिजो बेपत्ता भएका रहेछन्, ज्यान बचाउन, आज सम्पर्कमा आए, एक जनाालाई उपचारका लागि पाल्पा रेफर गरेको छ,’ कुँवरले भने ।

यसैबीच कांग्रेसले बल्देधुरीमा भएको घटनाका दोषीलाई चाँडो भन्दा चाँडो कारबाही गर्न माग गरेको छ । कांग्रेस प्रवक्ता विश्‍वप्रकाश शर्माले विज्ञप्ति जारी गर्दै दोषीलाई कारबाही गरिनुपर्ने बताएका छन् ।