आइतबारबाट हेटौंडामा १५ बेडको आइसोलेसन सञ्‍चालनमा आउने

मकवानपुर : हेटौंडामा आइतबारदेखि १५ बेडको आइसोलेसन सञ्चालनमा ल्याउने तयारी छ । हेटौंडा उप-महानगरपालिकाले हेटौंडा-६, स्थित गौरिटारमा १५ बेडको आइसोलेसन वार्ड सञ्‍चालनमा ल्याउन लागेको हो । हेटौंडामा कोभिड-१९ संक्रमितहरूको संख्या दिनहुँ बढ्दै गएकोले संक्रमितलाई स्वास्थ्यकर्मीको निगरानीमा राख्‍न अक्सिजनसहितको आइसोलेसन वार्ड तयार गरिएको उपमहानगरका जनस्वास्थ्य निरीक्षक भोला चौलागाईले बताए ।
 
उनका अनुसार सामान्य लक्षण नदेखिएका कोभिड संक्रमित होम आइसोलसनमै बस्ने र लक्षण देखिएको संक्रमितलाई आइसोलेसनमा राखेर उपचार गरिनेछ । हेटौंडाको गौरिटारमा १ सय २० बेड को आइसोलेसन वार्ड यसअघि सञ्‍चालनमा रहे पनि हालको लागि १५ बेडको अक्सिजनसहितको आइसोलेसन वार्ड सञ्‍चालन हुने उनको भनाइ छ । यसअघि बागमती प्रदेश सरकारले स्थापना गरेको गौरिटार आइसोलेसन अब हेटौंडा उप–महानगरपालिकाले सञ्‍चालन गर्नेछ । 

मकवानपुरमा पछिल्लो एक हप्तामा एक सय जना भन्दा बढीमा संक्रमण पुष्टि भइसकेको छ । मकवानपुरमा हेटौंडा अस्पतालबाट कोभिडको पीसीआर परीक्षण गरिदै आएको छ भने वनस्खण्डी स्वास्थ्य चौकीबाट एन्टिजेन परीक्षण हुँदै आएको छ । हेटौंडा अस्पतालले एक हजार रुपैयाँ शुल्क लिएर कोभिडको पीसीआर परीक्षण गर्ने गरेको अस्पतालका सुचना अधिकारी राजिव झाले जानकारी दिए ।  ‘कोरोना परीक्षण गर्न अनिवार्य चिकित्सकको सिफारिस चाहिन्छ,’ उनले भने । 

---

यसअघि प्रदेश सरकारले निशुल्क रूपमा कोभिड परीक्षण गर्दै आए पनि अहिले काभिड परीक्षण शुल्क तिरेर गर्नुपर्ने भएको हो । हेटौंडा अस्पतालमा आउने सेवाग्राहीहरू तथा कोभिड परीक्षण भएका परिवारको सदस्यहरूले मात्रै जिल्लामा कोभिड परीक्षण गराएको उनले बताए । यस्तै हेटौंडा अस्पतालमा गम्भीर खालका कोभिड संक्रमितको उपचार गर्न १० बेडको आइसोलेसन वार्ड तयार भएको छ । 

२० बेडको आइसोलेसन वार्ड तयार भइरहेको अस्पतालका मेडिकल सुपरिटेण्डेण्ट डा. प्रविण श्रेष्ठले बताए । हेटौंडामा अस्पतालमा गौरिटार आइसोलेसनले रिफर गरेर पठाएको संक्रमितको मात्र उपचार हुने उनको भनाइ छ । अस्पतालको आइसोलेसनमा भेन्टिलेटरसहितको सेवा हुनेछ । कोराना संक्रमितलाई ओसारपसार गर्न मकवानपुरमा दुई एम्बुलेन्स तयारी अवस्थामा राखिने भएको छ । गौरिटार आइसोलेसन वार्ड र हेटौंडा अस्पतालमा एक÷एक एम्बुलेन्स तयारी अवस्थामा राखिने भएको हो । 

यसैगरी शनिबारदेखि प्रदेश-२ को बारा जिल्लाबाट मकवानपुर प्रवेश गर्ने मुख्य नाका रातोमाटोमा ज्वरो क्लिनिक सुरु भएको छ । अब उच्च ज्वरो आएकाहरूलाई नाकाबाटै फिर्ता पठाइनेछ ।