३० मिनेटमा कोभिडले बुटवलमा तीन जनाको मृत्यु

बुटवल : बुटवलस्थित लुम्बिनी प्रादेशिक अस्पतालले सञ्‍चालन गरेको कोरोना बिशेष अस्पतालमा आधा घण्टाका बीचमा तीन जना कोभिड-१९ संक्रमितको मृत्यु भएको छ । उपचारका लागि अस्पताल भर्ना भएका उनीहरुको आज बिहान मृत्यु भएको हो ।

प्रादेशिक अस्पतालले जानकारी दिए अनुसार बुटवल ११ का ३१ वर्षीय पुरुषको राती २:३० बजे मृत्यु भएको थियो भने २:४५ बजे बुटवल १४ का ६६ वर्षीय पुरुषको मृत्यु भएको थियो । त्यसैगरि ३ बजे मायादेवी ६ का ७२ वर्षीया महिलाको पनि उपचारका क्रममा मृत्यु भएको लुम्बिनी प्रादेशिक अस्पतालका प्रवक्ता डा. बिष्णु गौतमले जानकारी दिए । उनीहरु दुई जना ११ गते अस्पताल भर्ना भएका थिए भने बुटवल १४ का संक्रमित ९ गते अस्पताल भर्ना भएका थिए ।

---

आज मृत्यु भएसँगै रुपन्देहीमा मृत्यु हुनेको संख्या १८४ पुगेको छ । हिजो पनि रुपन्देहीमा उपचारका क्रममा ६ जनाको मृत्यु भएको थियो । आजबाट रुपन्देहीमा लकडाउन शुरु भएको छ । यहाँ १ हजार ८ सय संक्रमित रहेका छन् ।