कारभित्र मृत भेटिएका तीन बालकको पहिचान खुल्यो

बुटवल : दाङको तुल्सीपुरमा पार्किङ गरिराखेको भारतीय नम्बर प्लेटको कारभित्र मृत फेला परेका तीन बालकहरूको पहिचान खुलेको छ । उनीहरू सबै तुलसीपुर उपमहानगरपालिका वडा नम्बर ६ बरूवा गाउँका रहेका छन् । 

इलाका प्रहरी कार्यालय तुलसीपुरका प्रहरी नायब उपरीक्षक शिवबहादुर सिंहका अनुसार कारभित्र मृत भेटिएका स्थानीय किरण परियारका छोरा ६ वर्षीय करण परियार, सन्तोष परियारका छोरा ७ वर्षीय सुवर्ण परियार र भीमबहादुर परियारका छोरा ९ वर्षीय सन्दिप परियार हुन् । 

---

शवलाई परीक्षणका लागि तुलसीपुरस्थित राप्ती प्रादेशिक अस्पतालमा लगिएको छ । अभिभावकहरूले १७ गते प्रहरी कार्यालयमा छोराहरू खोजिदिन निवेदन दिएका थिए । तीन बालकको शव एकै कारभित्र फेला परे पनि घटनाबारे अहिलेसम्म प्रहरीले पत्ता लगाउन सकेको छैन । 

घटना कसले र किन गर्‍यो भन्‍ने अनुसन्धानकै क्रममा छ । प्रहरीका अनुसार कार धनी यादवप्रसाद गैह्रे रहेको पत्ता लागेको छ । उनलाई अनुसन्धानका लागि नियन्त्रणमा लिइएको छ ।