हेटौँडा अस्पतालमा संक्रमितको चाप बढेसँगै २० बेडले धान्‍न सकेन

हेटौँडा : हेटौँडा अस्पतलामा सञ्‍चालनमा आएको २० बेडको कोभिड-१९ उपचार कक्षले संक्रमितको चाप बढ्न थालेपछि धान्‍न नसक्‍ने भएको छ । जिल्लामा सक्रिय संक्रमितको संख्या ६ सय नाघेसँगै २० बेडको उपचार कक्षले नधान्‍ने अवस्था आएको हो ।

अस्पतालको आकस्मिक सेवा, प्रसुती सेवा र ज्वरो क्लिनिकलाई यथावत राखेर आइसियू, एचडियू कक्षलाई कोभिड सेवामा परिणत गर्ने भएको छ ।

---

यस्तै अस्पतालको अन्य ओपिडी सेवाहरू अर्का सुचना नभएसम्म बन्द गर्ने आज बसेको अस्पताल व्यवस्थापन तथा सञ्‍चालन समितिको बैठकले निर्णय गरेको छ । यस्तै पिसिआर रिपोर्ट एसएमएस वा अनलाइनबाट दिइने भएको छ । कोभिड परिक्षण गरी रिपोर्ट बिरामीहरूलाई अस्पताल परिसरभित्र कोभिड सस्पेक्टेड वार्डमा राखेर अन्तरिम उपचार सेवा दिने निर्णय गरिएको अस्पताल व्यवस्थापन समितिका सदस्य उत्सव चौलागाईले जानकारी दिए ।    

हेटौँडा उपमहानगरपमा हालसम्‍म कोभिडले मृत्यु हुनेको संख्या ३० पुगेको छ । हेटौँडा अस्पतालकाको कोभिड-१९ उपचार कक्षमा अहिले १४ जना गम्भीर संक्रमितहरू उपचाररत छन् । उनीहरू मध्ये ३ जनाको स्वास्थ्य अवस्थामा सामान्य भएपछि गौरिटार आइसोलेसनमा पठाइएको छ ।