बुटवल र बाँकेमा ११ संक्रमितको मृत्यु

बुटवल : कोभिड-१९ संक्रमणबाट बुटवल र बाँकेमा गरि पछिल्लो १२ घण्टामा ११ संक्रमितको मृत्यु भएको छ । कोभिड-१९ संक्रमणबाट लुम्बिनी प्रादेशिक अस्पतालमा उपचाररत ३ जनाको मृत्यु भएको हो ।

प्रादेशिक अस्पतालका उपचाररत १ संक्रमितको गएराति र २ जना संक्रमितको बिहान मृत्यु भएको अस्पताल प्रशासनले जानकारी दिएको छ । २ जना संक्रमितको प्रादेशिक अस्पतालको आकस्मिक कक्ष र एक जना संक्रमितको कोरोना बिशेष अस्पताल धागो कारखानाको आइसीयू कक्षमा मृत्यु भएको अस्पतालका सूचना अधिकारी डा.विष्णु गौतमले जानकारी दिए ।

---

तिलोत्तमा नगरपालिका ४ का ३६ वर्षीय पुरुषको गएराति अस्पतालको आकस्मिक कक्षमा मृत्यु भएको उनले बताए । त्यस्तै नवलपरासी भूमहीका ४८ वर्षीय पुरुषको बुटवल कोरोना विशेष अस्पतालको आइसीयूमा उपचारका क्रममा आइतबार बिहान मृत्यु भएको हो । बैशाख २४ गते कोभिड पुष्टि भएका ती पुरुष २६ गते अस्पतालमा भर्ना भइ उपचारत रहेको डा.गौतमले जानकारी दिए ।

त्यस्तै गुल्मी सत्यवती गाउँपालिका ५ निवासी ४५ वर्षीय पुरुषको आकस्मिक कक्षको वार्डमा उपचारका क्रममा मृत्यु भएको छ । बैशाख २८ गते भर्ना भएका उनको बिहान मृत्यु भएको डा.गौतमले बताए । योसँगै रुपन्देहीमा कोरोना संक्रमणबाट मृत्यु हुनेको कूल संख्या ३३९ पुगेको छ ।

यस्तै बाँकेमा पछिल्लो १२ घण्टामा ८ जनाको मृत्यु भएको छ । शनिबार साँझ ६:३० देखि आइतबार बिहान ६:३० बजेसम्म ८ जना संक्रमितको मृत्यु भएको हो । उनीहरूमध्य २ जनाको नेपालगन्ज मेडिकल कलेज शिक्षण अस्पताल र ६ जनाको भेरी अस्पताल नेपालगन्जमा मृत्यु भएको थियो । 

मृत्यु हुनेहरूमा मधुवन नगरपालिका-९ बर्दियाका ४० वर्षीय पुरुष, बढैयाताल गाउँपालिका-१ बर्दियाका ५० वर्षीय पुरुष, गौरीगंगा गाउँपालिका-४ कैलालीका ५२ वर्षीय पुरुष, रुम्टिगढी-३ रोल्पाका ३५ वर्षीय पुरुष, बढैयाताल गाउँपालिका-२ बर्दियाका ८७ वर्षीय पुरुष छन् ।

त्यसैगरि नेपालगन्ज उपमहानगरपालिका-१९ बाँकेका ६० वर्षीय पुरुष, कोहलपुर नगरपालिका-१५ बाँकेका ६७ वर्षीय पुरुष तथा राप्ती सोनारी-२ की ५२ वर्षीया महिलाको पनि कोरोना संक्रमणबाट मृत्यु भएको छ ।

डीसीसीएमसी बाँकेका कोरोना फोकलपर्शन तेज ओलीका अनुसार कोभिडकाकारण बाँके जिल्लामा मृत्यु हुनेको संख्या २ सय ३५ र बाँके जिल्लाबाहिरबाट उपचार गर्न आएका कोरोना संक्रमितको मृत्यु हुने संख्या १ सय ८३ पुगेको छ ।