योजनाविहीन योजना आयोग

हेटौंडा : सिद्धान्ततः प्रदेश नीति तथा योजना आयोगले सरकारलाई योजना दिने हो । तर योजना आयोग स्वयं योजनाविहीन छ । त्यहीँकारण आयोगको खारेजीबारे प्रदेश सभामा विपक्षी कांग्रेस नेता इन्द्र बानियाँले पटक-पटक आवाज उठाइरहेका छन् ।

आगामी आर्थिक वर्ष २०७८/७९ को नीति कार्यक्रम र बजेट निर्माणको समय छ । बजेट निर्माणमा पहुँचवाला नेताका क्षेत्रमा मात्रै ठूला योजना र विकास बजेटहरू बढी छुट्टिने गरेका छन् । संसदीय समितिले प्रदेश सरकार र मन्त्रालयलाई आवश्यक सुझाव र निर्देशन दिने दायित्व बोकेको भए पनि प्रदेश सभाको अर्थ तथा विकास समिति आफै निस्क्रिय छ । 

---

यसअघिका अर्थ तथा विकास समिति सभापति सरेश नेपाल प्रदेशको उद्योग, पर्यटन वन तथा वातावरण मन्त्री बने । उनी मन्त्री बन्‍नु पूर्व समिति सभापति रहँदा पनि समितिले भनेजस्तो काम गर्न सकेको थिएन । यो वर्षमा समितिले रकमान्तर र कोभिडको समयमा काम नहुँदा बन्द हुन लागेको आयोजनाको बजेट फ्रिज नगर्न भौतिक विकास मन्त्रालय र आर्थिक मामिला मन्त्रालयलाई निर्देशन दिएको थियो । 

यी बाहेक पाँच-सात वटा वैठक बसेको समितिका सचिव परासर खरेलले जानकारी दिए । उनका अनुसार समितिमा कतिपय विषयको निर्णयहरू अझै हुन बाँकी छन् । बैठकमा पनि सामान्य छलफल मात्रै हालसम्म भएको उनको भनाई छ । 

चालू वर्षमा समितिले प्रदेशका २ मन्त्रालयलाई निर्देशन दिएपनि प्रदेश सरकारलाई भने कुनै निर्देशन वा सुझाव दिन सकेन । केन्द्रमा समितिहरूको सक्रियता निकै देखिन्छ । तर प्रदेशमा भने समितिहरू बलियो बन्‍न सकेका छैनन् ।

बागमती प्रदेश सभामा अर्थ तथा विकास समितिको सभापति नभएपछि अन्य सदस्यहरू पनि अन्यौल भएका छन् । समितिमा १९ जना सदस्यहरू छन् । उनीहरू्मध्ये  आधा सांसदहरूको उपस्थितिमा जेष्ठ सदस्यको रुपमा आङदेण्डी लामाको संयोजकमा समितिको बैठक प्रदेश सभाको आठौ अधिवेशनको बैठक बसेको भोलिपल्ट बसेको समिति सदस्य शोभा शाक्यले बताइन् । 

समितिको बैठकले वार्षिक प्रतिवेदन तयार गर्न एक उपसमिति निर्माण गरेको छ । आङ देण्डी लामाको संयोजकमा शशिजंग थापा, शोभा शाक्य, शान्ति थिङ र शान्ति पौडेल उपसमितिमा छन् । तर उपसमितिले छलफलका लागि भने बोलाएको छैन । समिति सक्रिय हुनुपर्ने समय भएपनि त्यसो हुन नसकेको समिति सदस्य शोभा शाक्यले बताइन् । उनी भन्छिन्, ‘अब बस्‍ने प्रदेश सभाको बैठकपछि नयाँ सभापति चयन हुने सम्भावना छ ।’

यता प्रदेश सभाको आठौं अधिवेशनको पहिलो बैठकमा सभामुख सानुकुमार श्रेष्ठले नयाँ मन्त्रिमण्डलको नाम पढेर सुनाएका थिए । अर्थ तथा विकास समितिको सभापतिबाट सरेश नेपाल बिदाई हुँदै उद्योग, पर्यटन वन तथा वातावरण मन्त्री बने । तर प्रदेश सभाको बेवसाइटमा भने सभापतिबाट उनको नाम हटेको छैन ।