खोप लगाएपछि ६० वर्षीया शुभद्रा भन्छिन् : अब धेरै बाच्‍ने आशा पलायो

काठमाडौँ : काठमाडौँ महानगरपालिका-३१ मा बस्ने ६० वर्षीया शुभद्रा श्रेष्‍ठ इपीएस स्कुलमा काग्त्यानीबाट कोभिडविरुद्धको पहिलो डोज खोप लगाउन आएकी छिन् ।

दोस्रो लहरको कोभिड सुरु भएयता धेरै मानिसको मृत्यु हुन थालेपछि उनको मनमा डर पसिसकेको थियो । उनी भन्छिन,' खोपको प्रतिक्षा गरिरहेका थियौँ । बल्लबल्ल खोप पायौँ । खोप लगाएको छु, अझै धेरै बाच्‍ने आशा पलाएको छ ।' पहिलो चरणको कोभिडभन्दा यस पटक बढी मानिसको मृत्यु भएकाले उनलाई डर लागेको छ ।

---

पहिलो चरणको कोभिडमा उनी संक्रमित भएकी थिइन् । परिवारमा रहेका ९ जना सदस्यलाई कोभिड लाग्दा डर नलागेको उनले बताइन् । शुभद्रा शारीरिक रूपमा अशक्त ६५ वर्षीय देवर मिनगोपाल श्रेष्‍ठलाई पनि खोप लगाउन साथामा लिएर आएकी थिइन् । देवरलाई खोप लगाउन पाएकीले उनको मुहारमा परबाट हेर्दा खुसी छाएको थियो ।

जीवरमणमा उप्रेतीले पनि खोप लगाएका छन् । उनको विचार शुभद्राको भन्दा फरक छ । सरकारले सबै उमेर समूहका मानिसलाई खोप लगाउन सकेमात्र धेरै मानिस सुरक्षित हुने उनले धारणा राखे । 'अहिलेसम्म सरकारले अनुदानमा पाएको खोप नागरिकलाई लगाएको छ,' उनले भने ।

सरकारले खोप लगाउन बाँकी रहेका मानिसलाई खरिद गरेर भए पनि लगाउनुपर्ने उनको भनाइ छ । खोपमा सबैको पहुँच पुग्‍नुपर्ने उनले बताए ।

'पहिलो चरणको कोभिडमा ज्येष्‍ठ नागरिकको मृत्यु भएको थियो,' पहिलो चरणको कोभिडमा मृत्यु भएका मानिसलाई सम्झदै उनी सम्झन्छन्,' दोस्रो चरणमा गत वर्षको तुलनाम यसपटक कमै ज्येष्‍ठ नागरिकको मृत्यु भएको छ । अहिले पहिलो डोजको खोप लगएकाले ज्येष्‍ठ नागरिकको कम मृत्यु भएको छ ।'

उप्रेतीलाई खोप लगाएपछि केही हुँदैन भन्ने विश्‍वास जागेको छ । सरकारले सबै मानिसलाई खोप लगाउने वातावरण बनाउनुपर्ने उनी बताउँछन् । ज्येष्‍ठ नागरिकलाई दोस्रो डोज खोप लगाउन बाँकी रहेकालाई चाँडै खोप उपलब्ध गराइ सुरक्षित राख्‍नुपर्ने  उनले बताए ।

खोप लगाएर बसिरहेका ६५ वर्षीय नारायण श्रेष्‍ठ दंग छन् । खोप लगाएका अन्य व्यक्ति भन्दा उनको फरक चिन्ता छ  । मैले मात्र खोप लगाएर भएन । घरमा रहेका अन्य स-साना उमेरका सदस्यले लगाउनुपर्ने उनको माग छ । खोप लगाएर सुरक्षित भएको छु । 'मेरो कारणले अन्य मानिसलाई कोभिड सर्छ भन्ने मलाई चिन्ता छ,' उनले भने ।

कोभिडविरुद्धको 'भेरोसेल' खोप ६० देखि ६४ वर्ष उमेर समूहका मानिसलाई खोप लगाउन थालिएको छ । एक साता अघि चीनबाट १० लाख खोप आएको थियो । यसअघि खोप लगाउन बाँकी उमेर समूहका मानिसलाई लगाइएको हो ।

सरकारले देशभरको ७ सय ५३ स्थानीय तहको खोप केन्द्रमा जेठ २५ (मंगलबार) गतेदेखि खोप सुरु गरेको हो । महानगरपालिकाका ३२ वटै खोप केन्द्रमा उत्साहजनक रूपमा लक्षित उमेर समूहका मानिसको उपस्थित रहेको छ ।

महानगरका सहरी स्वास्थ्य सेवा विभागका प्रमुख हरिबहादुर कुँवरका अनुसार पहिलो दिन ८ हजार ७ सय ४७ जनाले खोप लगाएका छन् । महानगरले करिब १ लाख मानिसलाई खोप लगाउने लक्ष्य राखेको छ ।

'कुनै पनि मानिस खोप लगाउन नछुटुन भनेर वडाका जनप्रतिनिधि मार्फत सबैलाई खोप लगाउन भनिएको छ,' उनले भने,' ६० देखि ६४ वर्ष सम्मका मानिसलाई मात्र खोप दिएका छौ ।'