गण्डकीमा मनाङेको भौतिक मोह

पोखरा : गण्डकी प्रदेशका विनाविभागीय मन्त्री दीपक मनाङेले भौतिक मन्त्रालय नपाए सरकारमै नजाने बताएका छन् । आफूले काम गरेर सिस्टम बसाल्नु पर्ने भौतिक मन्त्रालयमा जान नदिने भएपछि आइतबार कार्यभार सम्हाल्न अस्विकार गरेको मनाङेले बताए । 

मुख्यमन्त्री कृष्णचन्द्र नेपाली पोखरेलले गत शुक्रबार नै विनाविभागीय मन्त्रीहरुलाई जिम्मेवारीको टुङ्गो लगाएका थिए । सो दिन मनाङेले युवा तथा खेलकुद मन्त्रालय लिने निर्णय भएको थियो । तर, मनाङेले मने भौतिक नपाएसम्म कुनै पनि मन्त्रालयको जिम्मेवारी नसम्हाल्ने अडान कसेका छन् । 

---

‘खेलकुदमा त सिस्टम बसाइसकेको छु । अब त्यहाँ अरु जो गएर पनि काम गर्न सक्छ । म भौतिकमा काम गर्ने हो । सहमति पूरा नभएसम्म जिम्मेवारी लिन्नँ भनेर भनिसकेको छु,’ मनाङेले भने । 

अहिले भौतिक मन्त्रालयमा माओवादीको दाबी छ । माओवादीले पनि भौतिक मन्त्रालय नपाएसम्म सरकारमै नजाने बताइसकेको छ । मनाङे भने माओवादीसँग आफ्नो सहमति जुटिसकेको र १२÷१२ घन्टा मन्त्रालय चलाउने गरी सहमति जुटेको अपरिपक्व प्रतिक्रिया दिए । 

‘१६ अर्बको बजेट माओवादी र म भएर चलाउने हो । बरु माओवादीले राति चलाउने, म दिउँसो चलाउने । १२/१२ घन्टा चलाउने के,’ उनले भने,‘माओवादीले बेलुका ५ देखि बिहान ५ सम्म चलाउँछ । म बिहान ५ देखि बेलुका ५ सम्म चलाउँछु । माओवादीले दिउँसोमा काम गरेर काम छैन भौतिकमा ।’

आफूले ठट्टा नगरेको उनको प्रतिक्रिया थियो । अझै कांग्रेसले पनि भौतिक दाबी गरे कांग्रेसलाई पनि भौतिक दिन सकिने हावादारी प्रतिक्रिया दिए । ‘कांग्रेसलाई पनि स्थान दिन सकिन्छ । ३ पार्टीले ८/८ घन्टा गरेर २४ घन्टा चलाउने,’ मनाङे थप्छन्, ‘मलाई बिहानै ५ बजे उठ्न गाह्रो पनि हुन्छ । म दिउँसो १२ देखि ५ बजेसम्म चलाउँछु । कांग्रेसले बिहान चलाओस् ।’

मनाङे यतिमै रोकिएनन् । यसअघिको पृथ्वीसुब्बा गुरुङ नेतृत्वको सरकार पनि आफूलाई भौतिक मन्त्रालय दिन नमानेपछि ढालेको उनको दाबी छ । गुरुङ सरकारमा खेलकुद मन्त्री बनेका मनाङेले गुरुङलाई विश्वासको मत दिने दिन एकाएक क्याम्प परिवर्तन गरेर ‘गायब’ भएका थिए ।  

‘पहिला पृथ्वीसुब्बा दाइको सरकार पनि यसमै कुरा नमिलेर ढलेको हो । रामशरण बस्नेतलाई राति काम गर्नु भनेको मान्नुभएन । राति काम गर्न सक्दिनँ भनेपछि सरकारलाई साथ छाडिदिएँ । मिलेर गर्ने हो नि सबै मिलेर जनताको काम,’ मनाङेको तर्क छ । 

कृष्णचन्द्र नेपाली पोखरेल नेतृत्वको सरकारमा किचलो कायमै छ । गत शुक्रबार निर्धारित ४ विनाविभागीय मन्त्रीको जिम्मेवारी सोमबार २ मन्त्रीले लिन मानेनन् । ऊर्जा तथा सिंचाइ मन्त्रालय लिने भनिएका हरिशरण आचार्य र युवा तथा खेलकुद मन्त्रालय लिने भनिएका स्वतन्त्र सांसद दीपक मनाङेले जिम्मेवारी सम्हाल्न मानेनन् । रोजेको मन्त्रालय नपाएपछि यी २ मन्त्रीले जिम्मेवारी सम्हाल्न अस्वीकार गरेका हुन् । 

कांग्रेसबाट मन्त्री बनेका कुमार खड्का तथा माओवादीबाट मन्त्री बनेकी मधुमाया अधिकारीले सोमबार कार्यभार सम्हालेका छन् । खड्काले सामाजिक विकास तथा अधिकारीले स्वास्थ्य मन्त्रालयको जिम्मेवारी सम्हालेका हुन् । 

जनता समाजवादीका हरिशरण आचार्यले आफूसँग गरिएको ३ बुँदे सहमति कार्यान्वयन नभएसम्म जिम्मेवारी नसम्हाल्ने बताएका छन् । विश्वासको मत लिने दिन मुख्यमन्त्री कृष्णचन्द्र नेपाली पोखरेलले जनता समाजवादीसँग ३ बुँदे सहमति गरेका थिए । जनता समाजवादीलाई अर्थ मन्त्रालयसहित २ मन्त्रालय दिने, सरकार सञ्चालनका लागि उच्चस्तरीय राजनीतिक संयन्त्र बनाउने तथा दलीय मान्यता पाउन कायम १० प्रतिशत थ्रेसहोल्डको व्यवस्था हटाउने सहमति मुख्यमन्त्रीले गरेका थिए । 

तर, अहिलेसम्म ती सहमति कार्यान्वयन नभएकाले आफूले जिम्मेवारी सम्हाल्न अस्वीकार गरेको आचार्य बताउँछन् । आफू कांग्रेस कार्यकर्ता नभएकाले सहमति कार्यान्वयन नभइ जिम्मेवारी सम्हाल्न नसक्ने उनी बताउँछन् । ‘यत्रो १६ दिन भइसक्यो सरकार बनेको अहिलेसम्म ती सहमति कार्यान्वयन हुन सकेको छैन,’ आचार्य भन्छन्, ‘जुनदिन सहमति कार्यान्वयन हुन्छ, त्यही दिन जसपाकै २ जना सांसद मन्त्री बनेर सरकारमा जान्छौँ ।’ 

आफूले अर्थ मन्त्रालयको दाबी छाडेकाले अरु बुँदामा सरकार सकारात्मक बनेर तत्काल कार्यान्वयनमा लाग्नुपर्ने उनको सुझाव छ । ‘जसपाले अर्थ पाउनुपर्छ भन्ने दाबी छाडिसक्यो, किन अड्चन बन्ने भनेर, तर उनीहरु अझै अरु बुँदामा कार्यान्वयन गर्न लागि परेको देखिँदैन,’ आचार्य भन्छन् । 

सरकारका प्रवक्ता कुमार खड्काले सरकार जनता समाजवादीसँग गरेको सहमतिहरुमध्ये थ्रेसहोल्ड हटाउने, २ मन्त्रालय दिने, उच्चस्तरी राजनीतिक संयन्त्र बनाउने कुरामा सहमत रहेको बताउँछन् । ‘हामी त्यसमा सकारात्मक छौं । तर थ्रेसहोल्ड सदनमा लगेर हटाउने हो, बजेटमाथिको छलफलपछि त्यो हटाउने प्रक्रिया थाल्छौं,’ उनले भने, ‘२ मन्त्रालय दिन्छौँ भनेकै छौँ, राजनीतिक संयन्त्र आजै बन्ने कुरा होइन, समय लाग्छ नि ।’