पेश्की रकम होटल खर्चका लागि होइन : रमेश लेखक

काठमाडौँ : नेपाली कांग्रेस क्रियाशील सदस्यता छानविन समितिका संयोजक रमेश लेखकले पार्टीसँग होटल र अन्य खर्चका निम्ति नभई आवश्यक सामान खरिद र जनशक्ति खर्चका निम्ति पेश्की माग गरेको बताएका छन् ।

‘आठ लाख ३० हजारभन्दा बढी क्रियाशील सदस्यहरूको अन्तिम सूची तयार गर्न र त्यस निम्ति आवश्यक कम्प्युटर, प्रिन्टर, स्टेशनरीका खरिदमा खर्च भएको हो’ लेखकले इकागजसँग भने, ‘त्यसअतिरिक्त सूची तयारीका निम्ति कम्प्युटरमा काम गर्ने, सफ्टवेयर इन्जिनियरलगायत जनशक्ति खर्चका लागि पनि हो ।’

---

छानबिन समितिले पार्टीसँग ४० लाख रुपैयाँ पेश्की मागेको विषयमा इकागजले समाचार प्रकाशन गरेको थियो । लेखकले भने, ‘ती कामका लागि उक्त रकम पेश्‍की स्वरुप माग गरिएको हो, त्यो रकम खर्च भइसकेको स्थिति होइन । ती सामाग्री खरिदका निम्ति पेश्कीका रुपमा माग गरिएको हो ।’

समितिले नेपाल-भारतमैत्री धर्मशाला तिलगंगामा रहेर क्रियाशील सदस्यता छानबिन गरिरहेको छ । लेखकले भने, ‘त्यो रकम धर्मशाला या होटललाई दिइएको होइन । अन्य प्रयोजनमा पनि खर्च भएको होइन ।’

उनका अनुसार, ‘कांग्रेसका ८ लाख ३० हजार क्रियाशील सदस्यहरूको नामावली तयार गर्ने, प्रत्येकको पाँच-पाँच प्रति प्रिन्ट गर्नुपर्छ । त्यति ठूलो संख्यामा प्रिन्ट गर्नुपर्ने भएपछि त्यसमा स्टेशनरी खर्च गर्न लाग्छ नै । त्यो कपी देशभर पठाउनुपर्छ’ लेखकले भने, ‘छानबिन समितिको काम सकिएपछि उक्त खर्च रकम पारदर्शी ढंगले सार्वजनिक गरिनेछ ।’