अमेरिकाबाट जोनसन एण्ड जोनसन सोमबार आइपुग्‍ने, एक डोज लगाए पुग्‍ने यो खोप कसले पाउँछ ?

काठमाडौँ : अमेरिकाद्वारा सहयोग प्राप्त हुने जोन्सन एण्ड जोन्‍सनको 'जान्सिन' खोप सोमबार ल्याइने भएको छ । बिहान ११ बजे कतार एयरवेजको नियमित उडानमा खोप आउने भएको त्रिभूवन अन्तरराष्ट्रिय विमानस्थलले जनाएको छ ।

सरकारले १५ लाख खोप कस्ता-कस्ता मानिसलाई लगाइने भनेर निर्णय गर्न सकेको छैन । स्वास्थ्य तथा जनसंख्या मन्त्रालयले खोप लगाउने विषयमा छलफल भइरहेकाले पनि कुन उमेर समूहका मानिसलाई खोप लगाइन निर्णय नभइसकेको खोप महाशाखाका प्रमुख डा. झलक शर्माले बताए । उक्त कम्पनीको 'जान्सिन' खोप एक डोज मात्र लगाए पुग्छ ।

---

कोभिड-१९ व्यवस्थापन समितिले खोप लगाउने सूची तयारी गरिसकेकाले प्राथमिकतामा लगाइने भएको छ । ६० वर्षदेखि माथिका मानिसलाई पनि खोप लगाइसकेकाले अब भने त्यसभन्दा तलका उमेर समूहलाई खोप लगाउन सकिने डा. शर्माको भनाइ छ ।

'५५ वर्षको माथिकाहरू नै पहिलो प्राथमिकतामा पर्ने भएका छन्,' शर्माले भने,' शिक्षक र वैदेशिक रोजगारीमा जानेहरूलाई लगाउने विषयमा छलफल भएको छ । खोप समितिमा वैदेशिक रोजगारमा जानेलाई पनि लगाउन सकिन्छ । तर सबै कुराहरू छलफलको चरणमा रहेको छ ।'

नेपालमा हालसम्म ६० वर्षदेखि ७५ वर्ष माथिकाले खोप लगाइसककेका छन् । फ्रन्टलाइनरको रुपमा काम गर्ने स्वास्थ्यकर्मी, सरकारी कर्मचारी, होटलमा काम गर्नेहरू, सफाइकर्मी, सञ्चारकर्मी र सुरक्षाकर्मी समेतले खोप लगाएका छन् ।

गत वर्षको माघ १४ देखि कोभिडविरुद्धको खोप लगाउन थालिएको थियो । पहिलोपटक भारतले अनुदानस्वरुप उपलब्ध गराएको १० लाख कोभिसिल्ड खोप लगाएको थियो । त्यसको केहि दिन लगत्तै १० लाख खोप खरिद गरेको थियो । एक लाख खोप भारतीय सेनाले नेपाली सेनालाई प्रदान गरेको थियो ।

चीनले पनि अनुदान स्वरुप भेरोसेल १८ लाख डोज उपलब्ध गराइसकेको छ । कोभ्याक्सबाट तीन लाख ४८ हजार खोप आएको थियो । नेपालले चीन सरकारसँग खरिद गरेको खोप शुक्रबार नेपाल ल्याइएको छ । पहिलो चरणमा आठ लाख खोप आएको छ । साउन ८ गतेसम्मा नेपाल एयरलायन्सको तीन वटा उडानबाट चीनबाट खरिद गरेको सबै खोप ल्याउने भएको छ ।

अहिलेसम्म सरकारले कति मूल्यमा खोप खरिद गरेको खुलाएको छैन । नन डिसक्लोज एग्रीमेन्ट अनुसार खोप खरिद गरेकाले मूल्य खुलाउन नमिल्ने स्वास्थ्य मन्त्रालयका कर्मचारीले बताउँदै आएका छन् ।