१२ को परीक्षा जनस्वास्थ्यका मापदण्ड प्रयोग गरेर सञ्‍चालन गर्न संसदीय समितिको निर्देशन

काठमाडौँ  - कक्षा १२ को परीक्षा जनस्वास्थ्यका मापदण्ड प्रयोग गरेर मात्र सञ्‍चालन गर्न संसदीय समितिले सरकारलाई निर्देशन दिएको छ । सिंहदरबारमा बुधबार बसेको प्रतिनिधि सभाअन्तर्गतको शिक्षा तथा स्वास्थ्य समितिले ‘कोभिड-१९ को सङ्क्रमणबीचमा कक्षा १२ लगायत अन्य परीक्षा सञ्‍चालन र स्वास्थ्य मापदण्ड’ विषयक छलफलमा  जनस्वास्थ्यका मापदण्ड पूरा गरेर मात्र परीक्षा सञ्‍चालन गर्न निर्देशन दिएको हो । 

केन्द्रमा चिकित्सक, नर्स र औषधिको व्यवस्था गरेर मात्र परीक्षा सञ्चालन गर्नुपर्ने समिति सभापति जयपुरी घर्तीले बताइन् । परीक्षार्थीलाई महामारीबाट जोगाउन जनस्वास्थ्य सम्बन्धी  मापदण्ड लागू गरी परीक्षा सञ्चालन गर्नुपर्ने उनको भनाइ छ ।

---

बैठकमा राष्ट्रिय परीक्षा बोर्डका सदस्यसचिव दुर्गाप्रसाद अर्यालले विद्यार्थीलाई सङ्क्रमणबाट जोगाउन छुट्टै होमसेन्टरको व्यवस्था गरिएको र अहिलेको परीक्षामा सहभागी हुन नसकेका सङ्क्रमित विद्यार्थीले पछि पनि परीक्षा दिने पाउने जानकारी दिए । बोर्डले परीक्षाका लागि अनलाइनबाट पनि प्रश्नपत्र पठाउने उनले बताए । 

बैठकमा समिति सदस्य गिरिराजमणि पोखरेलले भौतिक उपस्थितिमा परीक्षा सञ्‍चालनका लागि शिक्षक र विद्यार्थीलाई खोप उपलब्ध गराउनुपर्नेमा जोड दिए । उनले नेपालको शिक्षा प्रणालीलाई प्रविधिमैत्री बनाउनुपर्ने बताउए । समिति सदस्य विद्या भट्टराईले विद्यार्थीलाई भीडभाड नगरीकन परीक्षा दिनपाउने वातावरण बनाउनुपर्ने आवश्यकता औल्याइन् । 

बोर्डका अनुसार करीब चार लाख विद्यार्थी कक्षा १२ को परीक्षामा सहभागी हुँदैछन् । बोर्डले यही साउन ३१ गतेदेखि कक्षा १२ को परीक्षा भौतिक उपस्थितिमा सञ्चालन गर्ने  जनाएको छ ।