नेपाल पक्षको रुपन्देही एमाले समानान्तर कमिटी समाजवादीमा रुपान्तरित

बुटवल- रुपन्देहीमा एमालेको समानान्तर कमिटी सञ्‍चालन गर्दै आएको माधवकुमार नेपाल पक्षको रुपन्देही जिल्ला कमिटी नेकपा एकिकृत समाजवादीमा रुपान्तरित भएको छ । शुक्रबार बुटवलमा बसेको नेपाल पक्षको रुपन्देही जिल्ला कमिटीको बैठकले सर्वसम्मत रुपमा नेपाल नेतृत्वको नेकपा (एकिकृत समाजवादी) मा रुपान्तरित हुने निर्णय गरेको हो ।

एमालेको जिल्ला स्तरिय समानान्तर कमिटीको बैठकले सिङ्गो कमिटी नेकपा (एकिकृत समाजवादी)मा रुपान्तरित हुने निर्णय गरेको सो पक्षका नेता सिद्विचरण भट्टराईले बताए । समानान्तर कमिटीका अध्यक्ष राजु गुरुङको अध्यक्षतामा बसेको बैठकमा सहभागीहरूले केपी ओली नेतृत्वको एमालेले देश, जनता र कम्युनिस्ट आन्दोलनलाई धोका दिएका कारण एमालेबाट बिद्रोहको विकल्प नरहेको निष्कर्ष निकालेका थिए । सहभागी सदस्यहरूले कम्युनिस्ट आन्दोलनको रक्षा गर्न र राष्ट्रियता जोगाउन सर्वसम्मतरुपमा एकिकृत समाजवादी पार्टीमा रुपान्तरित हुने निर्णय गरेको भएको भट्टराईले जानकारी दिए ।

---

बैठकमा साविक एमाले उपाध्यक्ष पुरुषोत्तम घिमिरे, सिद्धार्थनगर नगरपालिकाकी उपमेयर उमा काफ्लेलगायतले क्रान्तिकारी रुपान्तरणका लागि एकिकृत समाजवादीमा समाहित हुनुको विकल्प नभएको बताएका थिए । सिद्धार्थ नगरपालिकाका नगर प्रमुख हरि अधिकारी र तिलोत्तमा नगरपालिकाकी उपमेयर जागेश्वरी चौधरीले कार्यव्यस्तताका कारण उपस्थित हुन नसकेपनि आफुहरूको समर्थन नेकपा (एकिकत समाजवादी)मा रहेको सन्देश उपलब्ध भएको उपसचिव भट्टराईले दाबी गरे ।