गोरखाको चुमनुबरी–६ चुम्चेतको चुमलिङमा हेलिकोप्टरबाट खाद्यान्न पुर्‍याइयो

काठमाडौँ – गत भदौ दुई गतेबाट लोप्ता र सर्दी भिरमा गएको पहिरो अहिलेसम्म नरोकिदा खाद्यान अभाव भएको गोरखाको चुमनुबरी गाउँपालिका वडा नम्बर ६ चुम्चेतको चुमलिङमा आज सेनाको हेलिकप्टरबाट खाद्यान्न पुर्‍याइएको छ । 
गोरखाका प्रमुख जिल्ला अधिकारी शंकरहरि आचार्यका अनुसार आज सेनाको हेलिकोप्टरले दुई पटक गरी तीन हजार चार सय २० किलोग्राम खाद्यान्न पुर्‍याएको छ । 

‘आज सेनाको हेलिकोप्टरले दुई पटक गरी तीन हजार चार सय २० किलोग्राम चामल चुमनुबरी गाउँपालिका वडा नम्बर ६ चुम्चेतको चुमलिङमा पुर्‍याएको छ,’ प्रमुख जिल्ला अधिकारी आचार्यले भने । 

---

गत शुक्रबार गृहमन्त्री बालकृष्ण खाण चुम्चेतमा पुगेको बेलामा स्थानीयले आफूहरूलाई खाद्यान्न समस्या भएको बताएका थिए । स्थानीयको तर्फबाट गृहमन्त्री खाणलाई ज्ञापनपत्र पनि बुझाइएको थियो । त्यसपछि मन्त्री खाणले सँगै जानुभएका मन्त्रालयका प्रवक्ता फणिन्द्रमणि पोखरेललाई खाद्यान्नको व्यवस्थाको पहल गर्न निर्देशन दिएका थिए । 

प्रवक्ता पोखरेलको पहलमा गोरखा सदरमुकामबाट आज सोही मात्रामा खाद्यान्न त्यहाँ पुगेको प्रमुख जिल्ला अधिकारी आचार्यले बताए । स्थानीयले गृहमन्त्रीसँग सड्क खुलाउन, टेलिफोनको टावर बनिसकेकाले सञ्चालनमा ल्याउन पनि माग गरेका थिए । यी माग पूरा गर्न पहल भइरहेको मन्त्रालयका प्रवक्ता पोखरेलले बताउनु भयो । 

लोप्ता र सर्दी भिरमा अहिलेसम्म सुख्खा पहिरो खसिरहेकाले स्थानीय पैदल पनि आवत जावत गर्न सक्ने अवस्था नरहेको आचार्यले बताए ।