६ दिनमा फर्कियो सेयर बजारमा हरियाली, कसले कमाए-कसले गुमाए ?

काठमाडौं : राजनीतिक अनिश्चिततासँगै ओरालो लागेको सेयर बजार फेरि पुरानै लयमा फर्किन थालेको छ । ६ दिन अघिकै अंकमा नेप्से परिसूचक फर्केको हो ।

गत मंसिर ३० मा नेप्से परिसूचक २०६१.४१ अंकमा पुगेको थियो । मंगलबार नेप्से ९५.४६ अंकले बढेर २०६१.४१ मै अडिएको छ । यस अवधिमा बजार चार दशमलव ८६ प्रतिशतले बढेको छ ।

---

आइतबार प्रधानमन्त्री केपी ओलीले प्रतिनिधी सभा विघटन गर्ने निर्णय गरे । राजनीतिक अस्थितरता बढ्ने संकेत पाएपछि लगानीकर्ताहरु जोखिमयुक्त सेयर बजारबाट बाहिरिन थाले । आइतबारको कारोबारमा नेप्से परिसूचक ४.७२ प्रतिशतले घटेको थियझ । नेप्से परिसूचक  ९६.८८ अंकले घटेर १ हजार ९ सय ३५ दशमलव ६६ विन्दुमा पुगेको थियो ।

तर, सोही दिन प्रधानमन्त्रीको कदमविरुद्धको मुद्दा सर्वोच्च अदालतमा पुग्यो । अदालतले सरकारको निर्णय बदर गर्ने र प्रतिनिधी सभा पुनर्स्थापना हुने अपेक्षा जनमानसमा जिवितै रहँदा लगानीकर्ताहरु 'पर्ख र हेर'को अवस्थामा छन् ।

ब्रोकर कमिशन घटाउने आश्वासन पाएकाले पनि लगानीकर्ताहरुमा उत्साह बढेको अनुमान छ ।पुस ३ मा अर्थमन्त्री विष्णु पौडेलले सेयर ब्रोकर कमिशन घटाउन निर्देशन दिएका थिए । पछिल्लो समय धितोपत्र बोर्डका अध्यक्ष भिष्मराज ढुंगाना पनि ब्रोकर कमिशन घटाउने विषयमा सकारात्मक देखिएका छन् । जसले लगानीकर्तामा उत्साह कायमै छ ।

साथै अधिकांश कम्पनीहरुको साधारणसभा पुस महिना बस्ने गरेको छ । गत आर्थिक वर्षको मुनाफाबाट लाभांश वितरण गर्ने समय भएकाले यसलाई लगानीकर्ताहरुले अवसरको रुपमा सदुपयोग गर्न चाहन्छन् । पुस मसान्तसम्ममा राख्ने गरी धेरै कम्पनी तथा वित्तीय संस्थाहरुको साधारणसभा डाकेका छन् । उनीहरुले आकर्षक लाभांश समेत घोषणा गरेका छन् ।

यद्यपि लगानीकर्ताहरुले लाभांश लिने भन्दा बढी सेयर किनबेच गरेर प्राप्त हुने लाभमा केन्द्रीत हुने गरेका छन् । मुलुकमा संकटको समयमा लगानीका सम्भावित क्षेत्रहरु कमजोर हुँदा लगानीकर्ताहरु सेयर बजारबाट नाफा कमाउने लोभले सेयर बजारमा लगानी बढाउने गर्छन् । सशस्त्र द्वन्द्वकालदेखि नेपालमा विगतका संकटपूर्ण अवस्थामा सेयर बजारमा उछाल आउने गरेको छ । भूकम्प र भारतीय नाकाबन्दी जस्तो संकटकालीन समयमा पनि सेयर बजार उकालो लागेको थियो । अहिले कोरोना महामारीले सबै आर्थिक क्षेत्र आक्रान्त छ । कोभिड-१९का कारण आर्थिक क्षेत्रमा परेको नोक्सानीलाई भरथेग गर्न सेयर बजारबाट लगानी बढाएर नाफा कमाउने दाउमा लागेके देखिन्छ ।

गत मंसिर १६ बाट नेप्से परिसूचक २००० अंकबाट उकालो लाग्न थालेको थियो । मंसिर १७ मै नयाँ किर्तिमानी कायम गर्दै नेप्से २०७१.०३ अंकमा पुग्यो । त्यसपछि नेप्सेमा उतारचढाव आइरहेको छ । नयाँ किर्तिमानी कायम भएपछि पछिल्लो १६ दिनमा नेप्से १९३२ अंकभन्दा तल झरेको छैन भने २०६७.१७ अंकभन्दा माथि बढेको पनि छैन ।

पछिल्लो १६ दिनयताको नेप्से परिसूचकहरु

मंसिर १५	१९९५
मंसिर १६	२०००.४०
मंसिर १७	२०७१.०३
मंसिर १८	२०५५.४५
मंसिर २१	१९३२.११
मंसिर २२	२००४.३९
मंसिर २३	१९९५.३५
मंसिर २४	१९५५.७५
मंसिर २५	१९६४.०२
मंसिर २८	२०१०.४५
मंसिर २९	२०६७.१७
मंसिर ३०	२०६१.४१
पुस १	२०५५.२२
पुस २	२०३२.५२
पुस ५	१९३५.६६
पुस ६	१९६५.९६

मंसिरमा २९ मा नेप्से परिसूचक ५६.७२ अंक अर्थात २.८२ प्रतिशत बढेर २०६७.१७ बिन्दुमा बन्द भएको थियो। यो ‘अलटाइम हाइ क्लोजिङ्ग’ भन्दा ४ अंक तल हो। यस अघि गत मंसिर १७ गते नेप्से २०७१.०३ विन्दुमा बन्द भएको थियो। जुन हालसम्मकै उच्च बन्द बिन्दु हो । यद्यपि, नेप्से त्यसपछिको कारोबार दिन अर्थात मंसिर १८ गते २११८.६८ बिन्दुसम्म पुगी २०५५.४६ विन्दु झरेर बन्द भएको थियो। सो २११८.६८ विन्दु हालसम्मकै उच्च ‘इन्ट्रा डे हाइ’ विन्दु हो ।

कसले कमाए, कसले गुमाए ?

सोमबार वाणिज्य बैंकहरुमा उच्च लाभांश घोषणा गरेको नबिल बैंकको सेयर मंगलबार १२३ अंकले बढेर रोकिएको थियो । राष्ट्रिय बिमा कम्पनी लिमिटेडको सेयर १३ सय ५९ अंकले बढेको थियो । राष्ट्रिय बिमा कम्पनीको प्रोमोटर सेयर पनि १३ सय २६ अंकले बढेको हो ।

सबैभन्दा बढी सेयर बढ्नेमा नेपाल लाइफ इन्स्योरेन्स कम्पनी, एनआइसी एशिया, अप्पर तामाकोशी पनि छन् ।   

सबैभन्दा बढी गुमाउनेमा नारायणी विकास बैंकका सेयर लगानीकर्ता छन् । नारायणीको सेयर ४८ अंकले घटेको छ । त्यसपछि युनाइटेड इदी-मार्दी आरबी हाइड्रोपावर लिमिटेडको घटेको छ ।  

यस अवधिमा २०५ कम्पनीको ५५ हजार ७ सय २१ पटकको कारोबारमा १ करोड २७ लाख १७ हजार १ सय ४६ कित्ता शेयर कारोबार भएको छ । ६ अर्ब ७४ करोड ७ लाख रुपैयाँ बराबरको खरीदबिक्री भएको छ ।

कारोबारमा आएका १२ ओटा समूहको परिसूचकमध्ये सबै समूहको परिसूचक बढेको हो । सबैभन्दा बढी जीवन बीमा समूहका परिसूचक ७.४३ प्रतिशतले बढेको छ । त्यसपछि निर्जीवन बीमा समूहमा बढेको छ । यो ५.७३ प्रतिशतले बढेको हो ।