दीर्घरोगीले कहिलेदेखि पाउँछन् कोभिडविरुद्धको अतिरिक्त खोप?

काठमाडौँ- सरकारले दीर्घकालीन रोग भएका ६० वर्षमाथिका उमेर समूहकालाई अतिरिक्त खोप दिने तयारी गरेको छ । राष्‍ट्रिय खोप सल्लाहकार समितिको सुझाव अनुसार मन्त्रालयले उक्त खोप दिने तयारी गरेको हो । कोभिडविरुद्धको अतिरिक्त खोप दिने विषयमा निर्णय भइसकेको स्वास्थ्य तथा जनसंख्या मन्त्रालयका सह-प्रवक्ता डा. समीरकुमार अधिकारीले जानकारी दिए ।

मन्त्रालयले राष्‍ट्रिय खोप सल्लाहकार समितिको सुझावअनुसार उक्त प्रक्रिया अगाडि बढाएको हो । रोग प्रतिरोधात्मक क्षमता कम भएका मानिसलाई पहिले लगाइसकेको खोप लगाउने तयारी छ । 'खोपको व्यवस्थापन भएपछि जिल्ला स्वास्थ्य कार्यालयले खोप लगाउने मिति सार्वजनिक गर्नेछन,' उनले भने,' मन्त्रालयले पनि त्यसको चाँडै घोषणा गर्नेछन् ।'

---

क्यान्सर, मृगौला र मुटु रोगी जस्ता अन्य दीर्घकालीन रोग भएका मानिसले अतिरिक्त खोप पाउने भएका छन् । बुष्‍टर डोज लगाउनका लागि सरकारले तत्कालै निर्णय नगरेको उनको भनाइ छ । 

यसअघि जुन कम्पनीको खोप लगाइएको थियो त्यही कम्पनीको अतिरिक्त खोप उपलब्ध गराइने भएको हो । अतिरिक्त खोपका लागि भेरोसेल, कोभिसिल्ड र अष्‍ट्राजेनिकाको खोप लगाएकाले पुनः त्यहीँ खोप लगाउनुपर्ने छ ।

कोभिडको नयाँ-नयाँ भेरियन्टको विकास भएकाले पनि अतिरिक्त खोप दिन लागिएको उनको भनाइ छ । ओमिक्रोनलगायतका नयाँ भेरियन्ट देखिएपछि थप अतिरिक्त खोप दिने  तयारी गरेको हो ।