युनाइटेडलाई उपाधि दाबेदार बनाउने दाउमा पोग्बा

काठमाडौं : म्यानचेस्टर युनाइटेडले प्रिमियर लिगमा शीर्षस्थानको लिभरपुलसँग अंक बराबर गरेको छ । शुक्रबार एस्टन भिल्लालाई २-१ ले पराजित गर्दै युनाइटेडले १६ खेलबाट ३३ अंक बनायो । भिल्लालाई पराजित गर्दा लामो समयदेखि आलोचित रहँदै आएका पउल पोग्बाले प्रभावशाली खेल देखाए । लिगको सुरुवाती चरणमा संर्घषरत रहेको युनाइटेड नयाँ वर्षको सुरुवातमा शीर्ष दुईमा पुग्‍ने, त्यो पनि पोग्बाको सहयोगमा भन्‍ने कसैले अनुमान गरेको थियो ।

अढाई महिना अघि मात्रै पनि युनाइटेड टोटनहमसँग पराजित हुँदै गर्दा, पोग्बाले टिममा मौका पाइरहेका थिएनन् । अझ पोग्बाका एजेन्टले त पूर्व युभेन्टस मिडफिल्डर अर्को सिजन युनाइटेडमा नरहने उद्‍घोष गर्न भ्याए । तर युनाइटेडका पछिल्ला दुई जितमा महत्वपूर्ण साबित भएका पोग्बा यस सिजन युनाइटेडलाई लिग जिताउन सक्षम छन् भन्‍ने संकत दिइरहेका छन् ।

---

लिभरपुललाई लिग उपाधिको प्रमुख दाबेदारका रूपमा लिइएको छ । आफ्नो पारम्पारिक प्रतिद्वन्द्वीलाई यदि चुनौती दिने भए, पोग्बाले युनाइटेडका लागि आउँदा खेलहरुमा यही लयलाई कायम राख्‍नसक्नु पर्नेछ । युनाईटेड प्रशिक्षक ओले गनर सोल्स्यार समेत पोग्बा प्रति आशावादी छन् । पछिल्ला महिना पोग्बाका बारेमा निराश रहँदै आएका नेर्वेजियन प्रशिक्षक सोल्स्यार, शारीरिक रुपमा बलिया विपक्षिविरुद्ध विश्वकप विजेता मिडफिल्डर महत्वपूर्ण हतियार हुने बताउँछन् ।

युनाइटेडले यसै साता बर्नलीको समाना गर्दैछ भने त्यसपछिको खेलमा लिभरपुलसँग भिड्दैछ । सिजन बलियो ढङगले अघि बढ्दै गर्दा युनाइटेडमा पोग्बाको महत्व बढ्दै जाने निश्चित छ । किनभने पोग्बा युनाइटेडलाई कठिन समयमा जित दिलाउने खुबी भएका थोरै खेलाडीमध्ये एक हुन् । भिल्लाविरुद्ध एन्थोनी मार्सियलले गोल गर्दा, आरोन वान विसाकाले असिस्ट दिएका थिए । तर त्यो आक्रमण, पोग्बाकै पासका कारण सम्भव भएको थियो । पोग्बा प्रत्यक्ष रुपमा गोल गर्ने कार्यमा सहभागी नहुँदा, एउटा पासले खेल परिवर्तन गर्ने क्षमता राख्छन् ।

पोग्बा भिल्लाविरुद्ध युनाइटेडको ‘लिडर’ का रुपमा प्रस्तुत भए । सहकर्मीका लागि गोलको अवसर सिर्जना गर्ने देखि एकल आक्रमण गर्ने सम्मा पोग्बा सक्रिय अनि उर्जावान देखिए । क्लब छाड्ने सुरमा रहेका भनिएका पोग्बाले भिल्लाको खेलमा भने आफु युनाइटेडका लागि सत प्रतिशत दिन तयार रहेको सन्देश दिए । पोग्बाले युनाइटेडको तेस्रो गोल गर्ने मौका नपाएको होइनन् । खेलको उर्ताद्धमा बक्सबाट गरेको प्रहार बाहिरियो । युनाइटेडले आगामी खेलमा कस्तो प्रदर्शन गर्छ भन्‍ने अनुमान गर्न सजिलो छैन । तर पोग्बाले आफ्नो बलियो लयलाई निरन्तरता राखे भने युनाइटेडले लिभरपुललाई उपाधि दौडमा टक्कर दिन छाड्ने छैन् ।