एक बैंकको एटीएमले अर्को बैंकमा कारोबार गर्दा दुई पटकसम्म शुल्क नलाग्‍ने

काठमाडौं : राष्ट्र बैंकले एउटा बैंकको एटिएमले अर्को बैंकको एटीएममा कारोबार गर्न नयाँ व्यवस्था गर्ने भएको छ । नयाँ व्यवस्था अनुसार मासिक रुपमा त्यस्तो कारोबार गर्दा दुई पटकमा शुल्क नलाग्‍ने भएको छ । दुईपटकभन्दा बढी कारोबारमा २० रुपैयाँ शुल्क लिन पाउने राष्ट्र बैंको बिहीबारको सर्कुलरमा उल्लेख छ । यी सुविधाहरू माघे संक्रान्ति (माघ १) देखि लागू हुने राष्ट्र बैंकले जानकारी दिएको छ ।

यसअघि कोभिड-१९ का कारण सरकारले जारी गरेको बन्दाबन्दीमा बैंकिङ कारोबारलाई सहज पार्न त्यस्तो सेवा निशुल्क गरेको थियो ।  

---

बैंक तथा वित्तीय संस्थाहरूले विद्युतीय माध्यमबाट हुने कारोबारमा शुल्क लिँदा ग्राहकको अनुमति लिनुपर्ने भएको छ । राष्ट्र बैंकले सर्कुलर जारी गर्दै यस्तो व्यवस्था गरेको हो ।

बैंक तथा वित्तीय संस्थाहरूले ईन्टरनेट बैंकिङ, मोबाइल बैंकिङ र एसएमएस बैंकिङ कारोबारमा सेवा शुल्क लिँदै आएका छन् । यस्तो कारोबारमा बैंकहरूले आफुखुशी शुल्क काट्ने गरेका छन् । तर अब त्यसरी शुल्क लिँदा ग्राहकलाई पूर्वजानकारी दिनुपर्ने अनिवार्य भएको छ ।

ईन्टरनेट बैंकिङ, मोबाइल बैंकिङ र एसएमएस बैंकिङ कारोबारको लागि एकाउन्टमा युजरनेम र पासवर्ड हराएमा बैंक नधाउनुपर्ने सुविधा ल्याएको छ । ग्राहकले त्यस्तो भएमा आफै रिट्राइभ गरेर विद्युतीय कारोबार पुन: सुचारु गर्न पाउने व्यवस्था गर्न राष्ट्र बैंको सर्कुलरमा उल्लेख छ ।