चिर्पट प्रहार गरेर प्रहरीको हत्या, तोरी बारीमा भेटियो शव

नेपालगन्ज : राष्ट्रिय अनुसन्धान विभाग बाँकेमा कार्यरत एक सिपाहीको हत्या भएको छ । सहायक सूचक (सिपाही) प्रविन थापामगरको बिहीबार राती हत्या भएको हो । नेपालगन्ज उपमहानगरपालिका-१८, कारकाँदो निवासी २७ वर्षिय प्रविण शुक्रबार दिउँसो मृत फेला परेका थिए ।

नेपालगन्जको कारकाँदो लग्दहवास्थित मेरीगोल्ड स्कुलदेखि १०० मिटर पूर्वमा उनको शव फेला परेको हो । प्रविण नेकपाका जिल्ला स्तरिय नेता डम्बर थापाको छोरा हुन् । युवा संघ बाँकेका पूर्वअध्यक्ष समेत रहेका थापाका उनी एक मात्र छोरा हुन् । नियोजित तवरले उनको हत्या गरेर शव फालिएको स्थानीयको आशंका रहेको छ ।

---

बिहीबार साँझ ५ बजेदेखि कार्यालयको सम्पर्कमा नरहेका उनी राती अबेरसम्म घर नफर्किएपछि परिवारले उनको खोजी गरेका थिए । जानकारी अनुसार रातीदेखिनैं प्रविणको मोबाइल स्वीच अफ थियो । कारकाँदौ लग्दहवास्थित मेरी गोल्ड स्कुलमा शुक्रबार अपरान्ह तोरीबारीमा शव भेटिएको जानकारी पाएपछि प्रहरी टोली घटनास्थल पुगेको थियो । टोलीले शवको पहिचान गर्दा प्रविणको शव भएको पुष्टि भएको थियो ।

बाँके प्रहरी प्रमुख ओम बहादुर रानाका अनुसार प्रारम्भिक अनुसन्धानबाट मृतकलाई काठको चिर्पट प्रहार गरि हत्या गरेको देखिन्‍छ । मृतकको टाउकोमा गम्भीर चोट लाग्‍नुका साथै शरिरमा निल डाम रहेका छन् । प्रहरीका अनुसार मृतकको शुक्रबार नै भेरी अस्पतालमा पोष्टमार्टम गरिएको छ । प्रहरीले असुसन्धान टोली बनाई अनुसन्धान शुरु गरेको जानकारी दिएको छ । प्रविण चार वर्षदेखि अनुसन्धानमा कार्यरत रहेको बताइएको छ ।