ऋणको किस्ता तिर्ने म्याद ३ महिना थप्‍न माग, २ वर्ष घाटामा गएका ऋणीलाई कालो सूचीमा नराख्‍न आग्रह

काठमाडौं : कर्जाको सावाब्याज बुझाउने अवधि तीन महिना थप गर्न नेपाल राष्ट्र बैंकसँग निजी क्षेत्रले माग गरेको छ । नेपाल उद्योग वाणिज्य महासंघको प्रतिनिधि मण्डलले राष्ट्र बैंकका गभर्नर महाप्रसाद अधिकारीलाई भेटी यस्तो माग राखेका हुन् । 

सोमबार महासंघका अध्यक्ष शेखर गोल्छाको नेतृत्वमा गएको महासंघको पदाधिकारी सम्मिलित प्रतिनिधिमण्डल राष्ट्र बैंक पुगेको थियो । कोभिड-१९ का कारण उद्योग व्यवसाय प्रभावित भएपछि कर्जाको सावा ब्याज तिर्ने म्याद पुससम्म थपिएको थियो । यो म्याद बढाएर चैतसम्म पुर्‍याउनुपर्ने महासंघको माग छ ।

राष्ट्र बैंकको पछिल्लो अध्ययनले अहिले अर्थतन्त्रमा केहि सुधार भएपनि ५४ प्रतिशत व्यवसाय मात्र सञ्‍चालनमा आएको देखाएको छ । सञ्‍चालनमा रहेका अधिकांश व्यवसाय पनि विशेषगरि बजारमा माग नबढेर अझै नगदको अभाव झेलिरहेको उनीहरूको गुनासो थियो । .

---

कोभिडबाट प्रभावित उद्योग व्यवसायको पुनरुत्थानका लागि मौद्रिक नीति मार्फत घोषणा गरिएका राहत प्याकेजहरू कार्यान्वयनमा धेरै समस्याहरू रहेको महासंघको भनाइ छ । मौद्रिक नीति मार्फत ५० अर्बको छुटै कोष बनाएर व्यवसाय निरन्तरताका लागि दिइने कर्जाको भर्खरैमात्र कार्यान्वयन सुरु भएको छ । करिब १० महिनादेखि प्रभावित व्यवसाय सञ्‍चालन निक्कै कठीन भइरहेको उनीहरूले बताएका छन् । यस्तो कर्जा बिना कुनै झन्झट उपभोग गर्न पाउने व्यवस्थाका लागि केन्द्रीय बैंकले विशेष भूमिका निर्वाह गर्नुपर्ने महासंघको भनाइ छ । 

दुई वर्ष घाटामा गएका ऋणीलाई कालोसूचीमा नराख्‍न आग्रह
राष्ट्र बैंकका गभर्नरले बारम्बार आग्रह गर्दा पनि कतिपय बैंक वित्तिय संस्थाले उद्यमी व्यवसायीलाई विभिन्‍न वहानामा कालोसूचीमा राख्ने गरेको उनीहरूको गुनासो छ ।  यस्तो अवस्थामा एकतर्फी रुपमा कालो सूचीमा नराखिदिन बैंक वित्तिय संस्थाहरूलाई आग्रह गर्दै यसको प्रभावकारी अनुगमनका लागि केन्द्रिय बैंक समक्ष अनुरोध गरेको महासंघले जानकारी दिएको छ । साथै लगातार दुई बर्ष घाटामा गएको ऋणीलाई 'वाचफुल' लिष्टमा राख्‍ने व्यवस्था पनि हाललाई स्थगित गर्न महासंघले आग्रह गरेको छ । 

महासंघबाट गएको प्रतिनिधिमण्डलमा महासंघका उपाध्यक्ष दिनेश श्रेष्ठ, वैंक विमा तथा वित्तिय समितिका सभापति साहील अग्रवाल, चलचित्र तथा मनोरञ्‍जन फोरमका सभापति आकाश अधिकारी र उपमहानिर्देशक गोकर्ण अवस्थी लगायतको उपस्थिति थियो ।