कांग्रेसको एकमात्रै एजेण्डा प्रतिनिधि सभा पुनर्स्थापना : रामचन्द्र पौडेल

मोरङ : नेपाली कांग्रेसका नेता रामचन्द्र पौडेलले कांग्रेसको एक मात्रै माग प्रतिनिधि सभा पुनर्स्थापना भएको बताएका छन् । त्यो माग पूरा गर्न आफूहरू जनता समक्ष गएको उनको भनाइ छ । 

आइतबार गुराँस पुस्तकालय विराटनगर बरगाछीद्वारा प्रकाशित ‘बरगाछी’ को १६ अंक  मुक्तिप्रसाद यदुनाथ चापागाईं विशेषांकको लोकार्पण गर्दै पौडेलले कांग्रेस प्रजातन्त्रको रक्षा र लोकतन्त्रको पहरेदारको हैसियतले पुनर्स्थापनाको विरोधको मुद्दा लिएर जनतामाझ गएको बताए । 

---

पौडेलले जनताले ठूलो त्याग, बलिदानबाट निर्मित संविधान भत्काउन नदिन पार्टीले सडक संघर्ष गरेको बताए । पौडेलले भने,‘पार्टी स्वतन्त्र समाज, समावेशीता र महिला अधिकारमा अग्रणी रहेको छ ।’ जनताको, चित्त दुखाएर होइन मन जितेर मात्र निर्वाचनमा जानुपर्ने पौडेलले बताए । 

कार्यक्रममा कांग्रेस केन्द्रीय सदस्य डा मीनेन्द्र रिजाल र गुरु घिमिरे संविधान र लोकतन्त्र रक्षाका लागि सडक संघर्ष अझ विस्तार र बृहत गर्नुपर्ने बताए । 

कार्यक्रममा पौडेलले प्रजातान्त्रिक आन्दोलनका योद्धा देवी डाँगीलाई २१ हजार राशीको मुक्तिप्रसाद यदुनाथ चापागाईँ सम्मान र कोरोना महामारीले मृत्यु भएकाको शव अन्त्येष्टिमा सक्रिय रुपमा सहयोग पुर्‍याउने तथा सङ्क्रमितको घर घरमा सेनेटाइजर गर्ने बरगाछी युवा समूहलाई  १५ हजार राशीको  सामाजिक पुरस्कारबाट सम्मान गरे ।