बेँसीशहर-चामे सडक आजबाट तीन दिन बन्द हुने

लमजुङ : गण्डकी प्रदेशअन्तर्गत पहाडी र हिमाली जिल्ला जोड्ने एक मात्र बेँसीशहर-चामे सकड तीन दिनका लागि बन्द गरिने भएको छ । लमजुङ र मनाङ जोड्ने सडकको स्तरोन्नति गर्न मंगलबार बिहान १० देखि बिहीबार राति १० बजेसम्मका लागि पूर्णरुपमा बन्द गरिने जिल्ला प्रशासन कार्यालयले विज्ञप्ति जारी गर्दै जानकारी गराएको हो । 

सडकखण्डअन्तर्गत लमजुङको उत्तरी भेग मस्र्याङ्दी गाउँपालिका- ४ स्यागेनिरको सडकमा ढलान कार्य हुने र सो स्थानमा सडक निकै साँघुरो भएकाले सानाठूला सबै प्रकारको सवारीसाधन आवतजावतमा पूर्ण रोक लगाइएको सहायक प्रमुख जिल्ला अधिकारी काजीमान सुनारले बताए । 

---

उनले भने, ‘डुम्रे-बेँसीशहर-चामे सडक योजना कार्यालयबाट प्रशासनलाई उक्त सडकमा सबै प्रकारका सवारी सञ्‍चालनमा रोक लगाएर निर्माण कार्य अगाडि बढाउन र सहज बनाउन अनुरोध गरेसँगै निर्माण कार्यलाई मध्यनजर गर्दै उक्त समय बन्द गर्न लागेका हौँ ।’ 

डुमे्र-बेँसीशहर-चामे सडक योजना कार्यालयका इन्जिनियर तथा सूचना अधिकारी सुरज महर्जनका अनुसार स्यागेनिरको १०० मिटर खण्डमा ढलान (पिसिसी) गरिनेछ । नेपाली सेनाले भिर खोपेर निर्माण सम्पन्न गर्दै विसं २०६९ मा सडक डिभिजन कार्यालय दमौली तनहुँलाई हस्तान्तरण गरेको थियो ।  (रासस)